افغان حکومت په تدريجي توګه د رسنيو ازادي کمزوري کوي يا یې له منځه وړي
25.09.2010 04:35له امريکا څخه خپرېدونکي ورځپاڼې وال سټريټ جورنال وايي چې د رسنيو د څارنې کميسيون غړو -چې مشري یې د اطلاعاتو او فرهنګ وزير سيد مخدوم رهين کوي - ورته ويلي دي د ټول افغان او بېنوا ملي ويبپاڼو د بندولو غوښتنه د ولسمشر حامد کرزي مرستيال مارشال قسيم فهيم کړې ده چې له وزارته یې غوښتي دي چې ويبپاڼو ته سزا ورکړي.
په رپوټ کې چې نن په وال سټريټ جورنال کې خپور شوی او په کابل کې یې خبريال يارسلاف ترفموف ليکلی راغلي دي چې ((کابل ته له راستنيدو سره سم غاښلي فهيم - چې ژوندی دی - د رسنيو د څارنې له کميسيون څخه - د اطلاعاتو او فرهنګ وزارت د مشرۍ لاندې يوه تقنيني څانګه ده - غوښتنه وکړه چې ويبپاڼو ته دې سزا ورکړي، د کميسيون غړي او د وزارت چارواکي وايي.))
په رپوټ کې ويل شوي دي چې د رسنيو د څارنې د کميسيون غړي وايي چې ((د ښاغلي فهيم دفتر له کميسيون څخه غوښتي دي چې د ټول افغان.کام خلاف دې ګام پورته کړي. ټول افغان په کابل بانک کې د ښاغلي فهيم د ورور د کړنو په اړه څېړنيز رپوټونه خپاره کړي دي او د ولسمشر په مرستيال [قسيم فهيم] او د هغه په ملګرو دوامداره نيوکې کوي.))
په رپوټ کې راغلي دي چې د ټول افغان ويبپاڼه لا تراوسه په افغانستان کې لوستونکي کتلی شي او په اړه یې اخري پرېکړه نه ده شوې خو د بېنوا ويبپاڼه د مخابراتو وزارت بنده کړې وه او د مخابراتو وزير اميرزي سنګين وال سټريټ جورنال ته ويلي دي چې دا کار یې د لویې څارنوالۍ په غوښتنه ترسره کړی دی. سنګين چې په خټه پښتون دی او وزارت ورته د پښتنو په حساب وررسېدلی دی وايي چې ملي ويبپاڼې ((د بندولو امر يې له هغې وروسته ورکړ چې د لوی څارنوال لارښونه ورورسېده)). سنګين وايي چې ((موږ چې هر څه کوو د قانون په چوکاټ کې یې کوو)). سنګين نه دي ويلي چې د کوم هېواد کوم قوانين ښيي ځکه چې د افغانستان اساسي قانون چې د هېواد تر ټولو لوړ قانون دی رسنيو ته ازادي ورکړې ده.
د وال سټريټ جورنال په رپوټ کې د ټول افغان.کام دا اند ياد شوی دی چې د دې ملي او په هېواد مينې ويبپاڼې او د افغانستان دنني او بهرني دښمنانو په وړاندې مورچل ځکه نړول کېږي چې ((له نړيوالو رسنيو یې د کابل بانک د تاوانونو په اړه رپوټونه ژباړلي و)). ټول افغان وال سټريټ جورنال ته ويلي و چې پر ويبپانه يې د افغانستان دښمنان ځکه بريدونه کوي او نه پرېږدي چې په افغانستان کې افغانان د دې ويبپاڼې له خوا خپاره شوي حقيقتونه وپېژني چې دا رسنيز پورتال په افغانستان کې د مافيا، مفسدينو، او جنګي جنايتکارانو سره مقابل کې سنګر نيولی او د دوی له جنايتونو پرده پورته کوي.
وال سټريټ جورنال ته د ولسمشر حامد کرزي وياند وحيد عمر ويلي دي چې ((د هغه سايټونو خلاف کار کوي (بندوي یې) چې غيراخلاقي شيان خپروي، د ترهګريزو ارګانونو له خوا چلول کېږي، او يا د سخت دريځي ښودنه کوي.))
داسې ښکاري چې د ولسمشر وياند وحيد عمر په افغانستان کې نه بلکه په کوم بل هېواد کې اوسېږي او په پښتو او دري يا نه پوهېږي او يا هم د افغانستان د هغه دښمنانو سره غاړه شوی دی چې په باور یې پښتانه ټول ((ترهګر)) دي. که نه نوموړی چې په ټول افغان او بېنوا ويبپاڼه څو دقيقې لوستل هم وکړي نو سره به یې خلاص شي چې دا ويبپاڼې له هغه افغانستان څخه دفاع کوي چې د دوی په مشرۍ کې رژيم پرې دا وخت داو لګولی او په جنګي جرمونو تورنو کسانو تر منځ یې ويشلی دی. وحيد عمر ته به نه وي معلومه چې په دې ويبپاڼو کې يواځيني غيراخلاقي ټکي په حکومت کې د ده سره د شريکو جنګسالارانو او فاسدو عناصرو نومونه دي چې دا ويپپاڼې یې په يادولو هم شرمېږي او بې له دې چې په غندنه یې ياد کړي بله چاره نه لري. دا چې وحيد عمر ملي ويبپاڼې د ترهګرو په کتار کې ودروي نو دا د دې مانا لري چې افغان دولت د هغو دښمنانو سره همغږی دی چې ټول پښتان ترهګر بولي او د دې وياړلي قام د تباهۍ پسې یې راخيستې ده او هر څوک چې ترې دفاع کوي د سخت دريځۍ ښودونکي یې بولي.
د وال سټريټ جورنال په رپوټ کې د رسنيو د څارنې د کميسيون يو غړی چې عبدالشکور دادرس نومېږي وايي چې ((دواړه ويبپاڼو [ټول افغان او بېنوا] د ملي شخصيتونو سپکاوی کړی دی او د قانون خلاف دي. که کومه رسنۍ په قصدي توګه اشتباه کوي نو بايد چې سزا ورکړل شي)).
د دادرس څرګندونې له تعصبه ډکې دي او ملي ويبپاڼې ورسره همدا توپير لري چې هغه کسان چې دادرس ته ملي شخصيتونه ښکاري، په حقيقت کې په جنګي جنايتونو او د افغان انسان په وژنه او له حقوقو یې په سرغړونه تورن دي. که د ملي شخصيتونو ساتنه دادرس او افغان حکومت ته ارزښت لري نو په افغانستان کې د ماندګار او پيام مجاهد غوندې ستمي رسنۍ خو د افغانستان يووالي ته ژمن نه دي، ولسمشر حامد کرزي او مېرمن پسې یې بدې خبرې ليکي، يو شمېر نورې رسنۍ احمد شاه بابا او مېرويس نېکه ته سپکې سپورې وايي، پوښتنه دا ده چې ايا دادرس ته دا خلک هم ملي شخصيتونه ښکاري او که نه! که ملي شخصيتونه وي نو بيا ولې دا ستمي رسنۍ تر اوسه فعاليتونه کوي او د افغانستان پر ځای د ايران، روسيې او نورو هېوادونو ګټو ته کار کوي.
د وال سټريټ جورنال اندېښنه ښودلې ده چې ((افغان حکومت د رسنيو د يو څه ازادۍ مخه نيسي)). دا اندېښنه یې هم ښودلې ده چې ((افغان حکومت په تدريجي توګه د رسنيو ازادي کمزوري کوي يا یې له منځه وړي)).
وال سټريټ جورنال ليکلي دي چې بېنوا ويبپاڼه په پښتو ژبه يو مشهوره ويبپاڼه ده او ټول افغان.کام یې د رښتيوني او په ټولنه کې د فساد د رسوا کونکي ژورناليزم ويبپاڼه بللې ده چې په پراخه کچه یې خلک تعقيبوي. دا لومړي ځل دی چې په افغانستان کې د ويبپاڼو په دا ډول مثبت رول او غښتلتيا نړيوالې رسنۍ اعتراف کوي چې بې له شکه افغان ولس ته به لا ډاډ ورکړي چې په ټولنه کې داسې زړور بچي شته چې د افغانستان له ملي ګټو په هره بيه دفاع کوي.
د والس سټريټ جورنال انګليسي رپوټ د دې ورځپاڼې په ويبپاڼه دلته لوستلای شئ. دلته یې هم لوستلای شئ.
د وال سټريټ جورنال رپوټ په ژباړه کار روان دی او ډېر زر به یې ژباړه لوستونکو ته وړاندې کړل شي. موږ په هېواد ميين ليکوالان رابولو چې د وال سټريټ جورنال په رپوټ کې په راغلو څرګندونو خپلې ليکنې ټول افغان ته راولېږي.
د ټول افغان او بېنوا د بندېدو په اړه نورې ليکنې: