سيند: جرنلسټ د هندو مذهب د سپکاوي په مقدمه کې بندي کړی شوی دی
د پاکستان د سیند صوبې په مير پور خاص ضلع کې د هندو ټولنې لخوا د يو جرنلسټ پرضد د مذهب د سپکاوي مقدمه درج کړی شوې او په جېل کې بندي کړی شوی دی.
د هند عدالت د کانګرس ګوند یو مشر راهول ګاندي ته د "مودي" نوم د سپکاوي په تور دوه کاله سزا اورولې ده
واشنګټن ــــ د هندوستان یو عدالت د دې هېواد د اپوزیشن مشر راهول ګاندي د هغې وینا پر سر د سپکاوي په مقدمه کې مجرم پېژندلی او دوه کاله د بند سزا یې ورته اورولې چې په 2019م کال کې یې کړې وه او په هغه کې یې غلو ته د مودي نوم کارولی وو. د هند د این ډي ټيلیویژن د خبر له مخې د پرېکړې په وخت راهول ګاندي په عدالت کې موجود وو. دا فیصله د وزیراعظم نریندرا د پلارني ریاست ګجرات په سورت ښار کې یو عدالت کړې ده. د عدالت د پرېکړې په غبرګون کې راهول ګاندي د مهاتما ګاندي یو قول پر ټویټر لیکلی چې وایي "زما د مذهب بنیاد ریښتینواله او عدمِ تشدد دی، حقیقت زما خدای دی او عدمِ تشدد هغه ته د رسېدو لاره ده". عدالت د دوه کاله بند سزا له اورولو وروسته د هغه ضمانت هم منظور کړی دی او د هغه سزا یې د یوې میاشتې لپاره ځنډولې ده، چې په دې وخت کې هغه د عدالت د پرېکړې خلاف درخواست هم ورکولای شي. د کانګرس د مشر راهول ګاندي خلاف دا مقدمه د واکمن ګوند بهارتیه جنتا پارټي د اسمبلۍ غړي او د ګجرات مخکیني وزیراعلی پرنیش مودي درج کړې وه. هغه په مقدمه کې د راهول ګاندي د هغې وینا حواله ورکړې چې پکې د رسنیو د رپوټونو له مخې هغه ویلي وو، "د ټولو غلو وروستی شریک نوم یا تخلص مودي ولې وي". د پرنیش مودي وکیل کیتن ریشموالا د پنجشنبې- زیارت په ورځ د عدالت تر فیصلې وروسته وویل "عدالت د راهول ګاندي خبرې د بې عزتۍ وړ ګڼلې دي او دوه کاله د بند سزا ورته اورول شوې ده". راهول ګاندي د پنجشنبې- زیارت په ورځ عدالت ته وویل چې د ده هغه تبصره د کومې ټولنې خلاف نه وه. د ګاندي ګوند کانګرس ویلي چې د هغه خلاف دا مقدمه د بي جې پي "بزدل او آمرانه" حکومت درج کړې ده ځکه چې وایي راهول "د دوی تیاره عملونه رسوال کوي." د کانګرس ګوند ویانده سوپریا شرینات وایي ګوند یې ټولې قانوني لارې لري او وبه یې وکاري. هغې وویل: "هیله ده چې د [دې] خاورې قانون به غالب شي." راهول ګاندي د کانګریس ګوند یو مخکښ مشر او د نهرو او ګاندي له سیاسي کورنۍ څخه دی، هغه به اوس د خپلې سزا خلاف اعلی عدالت ته اپیل یا خواست کوي. د هندوستان د وفاقي حکومت یو سلاکار کېنچن ګپتا وایي، راهول ګاندي چې د قومي اسمبلۍ غړی دی د عدالت له خوا تر سزا کېدو وروسته د هیواد د سپریم کورټ د 2013م کال د حکم سره سم د پارلمان له غړيتوبه سمدستي نااهله کېدای شي. ګاندي د 2024م کال تر عمومي ټاکنو مخکې د نریندرا مودي له مهمو سیالانو څخه ګڼل کېږي چې پر ډیلي واکمنې عام آدمي پارټۍ یې هم ملاتړ کړی دی. یادونه:- د رپوټ اکثره مواد له رویټرز خبري ایجنسۍ اخیستل شوي دي
پاکستان: د پارلیمان غړو ملک ته د ورپېښو چېلنجونو د مخنيوي دپاره د ګډې ناستې غږ کړی
د پاکستان د پارلیمان غړو ویلي ملک چې د اقتصادي، سياسي، او اييني مشکلاتو سره مخ دی، د دې بحران څخه ويستلو دپاره په حکومت کې او مخالفه پاکستان تحریک انصاف ګوند له پکار ده چې خپل اختلافات د خبرو د لارې ختم کړي او مقابله دې په سیاسي مېدان کې وکړي.
پاکستان،افغانستان او د نړۍ زیاترو هیوادونو کې د رمضان میاشت لیدل شوې،نن وړومبۍ روژه ده
پاکستان،افغانستان سعودي عرب اؤ دمنځني ختیځ په زیاتره هیوادونو کې د رمضان میاشت لیدل شوې ده اؤ نن د زیارت په ورځ پکې وړومبۍ روژه ده خو په بنګله دیش اؤ هند کې بیا د میاشتې نه لیدل کیدو له امله د جمعې په ورځ د وړومبۍ روژې اعلان شوی دی. په پاکستان کې دمیاشت لیدنې د مرکزي دولتي کمیټې غونډه دچهارشنبې په ماښام پېښور کې ددغه کمیټې دمشر مولانا عبدالخیبر ازاد په مشرۍ کې شوې چې دشپې ناوخته یې د میاشت لیدنې اعلان وکړو. مولانا عبدالخیبر وویل کمیټې ته ته دمردان،صوابۍ،قلعه سیف الله،رحیم یار خان،بهاولپور اؤ دهیواد دنورو برخو نه دمیاشت لیدنې شهادتونه رارسیدلي اؤ د زیارت په ورځ وړومبۍ روژه ده. دمرکزي رویت هلال کیمټې ترڅنګ دمیاشت لیدنې دغیر دولتي کمیټې غونډه هم دپېښور په قاسم علي خان جومات کې شوې ده اؤ نن د زیارت په ورځ یې د وړومبۍ روژې اعلان کړی دی. د دولتي اؤ غیر دولتي کمیټیو لخوا په یو وخت دمیاشتې د لیدنې داعلان له امله سږکال په ټول پاکستان کې په یوه ورځ روژه راغلې ده . تر دې وړاندې به عموماً د روژې اؤ اختر د میاشتو دلیدنې پسر داختلافونو له امله روژه اؤ اختر په بیلابیلو ورځو ویشل کیدو. په ټولنیزو رسنیو ګڼ شمیر فعالینو دمرکزي رویت هلال کمیټې دمشر مولانا عبدالخیبر ازاد ستاینه کړې ده چې دمیاشت لیدنې شهادتونو ته یې تر پینځوؤ ساعتو اوږد انتظار کړی اؤ په خلاصه سینه یې دمیاشت لیدنې شرعي شهادتونه قبول کړي دي. تر دې وړاندې دپاکستان د مرکزي رویت هلال کمیټې په پخواني مشر مفتي مفتي منیب الرحمان نیوکې کیدلې چې د روژې اؤ اختر دمیاشتو په لیدنو کې دپښتنو شهادتونه نه قبلوي خو مفتي منیب دغه نیوکې ردولې اؤ دریځ یې لرلو چې یوازې دقوي شهادتونو په اساس د میاشت لیدنې اعلان کوي. د روژې په اړه د امریکا د ولسمشر پیغام: د امریکا ولسمشر جو بایډن په یو ټویټ کې مسلمانانو ته د روژې په مناسبت مبارکي ورکړې. ښاغلي بایډن په ټویټر باندې لیکلي، : "جېل او زه مسلمانو ټولنو ته دلته د هېواد دننه او په ټوله نړۍ کې د یوې برکتي او نیکمرغې میاشتې هیله لرم. رمضان الکریم." د روژې د میاشتې په رارسیدو د امریکې د بهرنیو چارو وزیر انتوني بلنکن هم امریکایي مسلمانانو لپاره خپل پیغام کې هیله ښکاره کړې ده چې د روژې دا مقدسه میاشت به د ټولو لپاره له امن ډکه وي. هغه ویلي "دلته امریکه اؤ بیرون له هیواده دمسلمانانو لپاره رمضان ددعا،غور اؤ فکر یوه مقدسه موده ده چې دکورنیو اؤ ټولنې سره په ګډه تېرول کیږي اؤ دکم حیثیت خلکو سره هم دې میاشت کې په پراخه سینه مرستې اؤ همدردۍ کولی شي " د ښاغلي بلنکن په پیغام کې ویل شوي "همدا وخت دی چې مونږ د غربت نه د اغېزمنو، د ظلم وستم، شخړو اؤ قدرتي افتونو سره د مخ خلکو په مرستې کولو خپله اجتماعي ذمه واري پوره کړو اؤ د ټولې دنیا مسلمانان به هم دې میاشت کې دخپلو ټولنو خدمت کوي"
عمران خان وایي، د مرتضا بوټو په څېر یې د وژنې پلان جوړ شوی
دپاکستان پخواني وزیراعظم اؤ دتحریک انصاف ګوند مشر عمران خان تور لګولی چې حکومت دپولیسو دعملیاتو په ترڅ کې دمرتضا بوټو د وژنې په څېر دخپل کور دننه دده د وژلو پلان هم جوړ کړی دی. هغه وایي حکومت غواړي خپل سړي دده دکور مخې ته د ورټولو شوو ګوندي فعالینو لیکو ته ورننباسي،هغوئ بیا څلور،پینځه پولیس ووژني اؤ دغسې پولیس دده کور ته وردننه شي اؤ دی په الغاؤ تلغاؤ کې ووژني. په عین حال کې دهیواد دکورنیو چارو وزیر رانا ثناء الله پارلیمان ته خپله وینا کې دعمران خان پلویان د وسله والو اؤ ترهګرو په نوم یاد کړي اؤ له پارلیمان یې غوښتي چې باید قانون پځاي کوونکو ادارو ته ددې وسله والو اؤ ترهګرو دقابو کولو لپاره ټول اختیارات ورکړي. پخپله یوه ویډیوي وینا کې عمران خان ویلي دپارلیمان ګډه غونډه کې به هڅه وشي چې دده ګوند له ټولټاکنو بهر کړل شي ځکه چې مخالفین یې پوهیږي که چرې ټاکنې وشي نو دهغوئ سیاست له مینځه ځي. عمران خان تور پورې کړو چې اسلام اباد کې عدالت ته د وړاندې کیدو پر مهال د هغه د وژنې پلان جوړ شوی ؤ اؤ دپولیسو نه ورته معلومه شوې ده چې په دغه مهال دعدالت مخې ته نامعلوم کسان دسي ټي ډي دځواکونو په یونیفارم کې ورټول شوي چې غوښتل یې دی لکه دمرتضا بوټو په څېر ووژني. هغه وویل د وژنې دغه پلان یې شنډ شوی اؤ اوس دپنجاب اؤ اسلام اباد دپولیسو سرلښکرانو (ایي جیز) اؤ دهغوي پشا پرتو لاسونو پلان جوړ کړی چې خپل سړي دده دکور مخې ته د ورټولو ګوندي فعالینو لیکو ته ورننباسي اؤ بیا دغلته پولیس عملیات وکړي. عمران خان وویل پلان دادی چې د دوي سړي به څلور،پینځه پولیس وولي،پولیس به بیا دده کور ته ورننوځي اؤ په الغاؤ تلغاؤ کې به دی ووژل شي. خو هغه دخپل ګوند په فعالینو غږ وکړو چې که پولیس هرڅه کوي ،یا دده نیول وغواړي نو باید هیڅ ورته ونه نیول شي. "دوي که تاسو هرڅومره راپاروي،هیڅ غبرګون ورته مه ښایئ،که زما پرضد نوی وارنټ هم راوړي نو کارکنان یې باید کور ته دننه راپریږدي،زه خپلو خلکو ته خواست کوم چې تاسو دچا پر وینا اشتعال کې مه راځئ" هغه وویل ګرفتارۍ ورکولو ته تیار دی خو خپل خلک به وژنې ته ورنه کړي. په عین حال کې پرون دپارلیمان ګډه غونډه کې د کورنیو چارو مرکزي وزیر رانا ثناء الله عمران خان هیواد کې داړي ګړي په جوړولو تورن کړی اؤ تور یې لګولی چې دهغه لیکو کې ترهګر اؤ وسله وال شامل دي. رانا ثناء الله دپارلیمان نه غوښتنه کړې ده چې باید ددې ترهګرو اؤ وسله والو دقابو کولو لپاره قانون پځائ کوونکو ادارو ته ټول اختیارات ورکړي. هغه وویل تر دې وړاندې هم عمران خان د وسله والو دلښکر سره په اسلام اباد ورختلی ؤ اؤ اوس یو وارې بیا زمان پارک کې په پولیسو ډزې شوې دي، دلیندو ګزارونه پرې شوي اؤ ګڼ شمیر پولیس ژوبل کړل شوي دي خو وایي پولیسو یو ډز هم نه دی کړی. هغه وویل عمران خان په تېرو یوولسو میاشتو کې هره ورځ دهیواد دننه دسیاسي اؤ انتظامي بحران پیدا کولو هڅه کړې ده،دا یوه فتنه ده اؤ که مخه یې ونه نیول شوه نو هیواد ته به زیان رسوي. خو عمران خان وایي مخالفین یې هڅه کوي چې دپارلیمان ګډه غونډه کې دده ګوند دالیکشن نه بهر کړي. هغه پخپله وینا کې ویلي مخالفین یې پوهیږي که چرې الیکشن وشي نو دهغوئ سیاست ختمیږي ځکه نو دالیکشن وروسته کولو لپاره یې اړي ګړي ته لاس اچولی دی
الیکشن کمیشن د پنجاب اسمبلۍ انتخابات وځنډول
دپاکستان الیکشن کمیشن داپریل په30مه نیټه دپنجاب اسمبلۍ لپاره کېدونکي انتخابات ځنډولې دي اؤ اعلان یې کړی دی چې اوس به دا ټاکنې داکتوبر په 8مه کیږي. دحکومت مخالفه ګوند مشر عمران خان دالیکشن کمیشن دا پریکړه غېراییني بللې ده اؤ ویلي یې دي که چرې دالیکشن کمیشن دا پرېکړه ومنل شي نو دا به پاکستان کې دقانون واکمنۍ ختمولو ته غاړه اېښودل وي. الیکشن کمیشن پخپله اعلامیه کې ویلي چې دپنجاب اسمبلۍ ټاکنو لپاره دامنیت وضعه غوره نه ده ځکه نو داټاکنې به په اتم اکتوبر کیږي. اعلامیه کې ویل شوي چې حکومت پنجاب کې دانتخاباتو امنیت لپاره دپوځي ځواکونو ورکولو څخه انکار کړی اؤ هیواد کې د روان اقتصادي بحران له امله دخزانې وزارت هم له پنګو ورکولو معذوري ښکاره کړې ده. دالیکشن کمیشن له مخې دخزانې،کورنیو چارو اؤ دفاع د وزارتونو اؤ دقانون پځائ کوونکو ادارو د رایو په رڼا کې په وخت پرامنه،بې پلوه اؤ رڼې ټاکنې کول شونې نه دي. الیکشن کمشن په دې اعلامیه کې په 8م مارچ دانتخاباتو جاري کړل شوی شیډول بېرته اخستی اؤ دانتخاباتو لپاره یې نوې نیټه 8م اکتوبر ټاکلې ده. دحکومت مخالفې ډلې پاکستان تحریک انصاف مشر اؤ پخواني وزیر اعظم عمران خان دالیکشن کمیشن ددې پرېکړې غندنه کړې ده اؤ دا یې دا ایین سراسري خلاف ورزي بللې ده. په ټویټر خپل بیان کې عمران خان ویلي نن هرتن ته دعدلیې اؤ وکیلانو سره په دې هیله ودریدل پکار دي چې هغوئ به دایین حفاظت کوي. هغه ویلي چې که چرې نن (دالیکشن کمیشن فیصله)ومنل شي نو دا پاکستان کې دقانون د واکمنۍ ختمیدل دي. عمران خان ویلي هغه خپلې دوه اسمبلۍ په دې هېله ماتې کړې وې چې په90 ورځو کې به دایین له مخې له نوي سره ټاکنې وشي . هغه ویلي خپلې دوه اسمبلۍ یې ددې لپاره نه وې ماتې کړې چې دایین اؤ قانون خلاف ورزۍ کوونکو فاشسټانو یوې ډلې ته د ترهګرۍ د راج مسلط کولو اجازه ورکړل شي. دعمران خان په وینا دپنجاب اسمبلي سږکال په 14مه اؤ دخېبر پښتونخوا اسمبلي په18مه جنورۍ ماته کړل شوې وه چې له دې وروسته دغو دواړو صوبو کې دنوؤ انتخاباتو دنیټې په نه اعلانېدو سپریم کورټ له خپله انده نوټس اخستی ؤ. سپریم کورټ پخپله پرېکړه کې ویلي وؤ چې داسمبلیو ماتېدو نه وروسته دایین له مخې په 90 ورځو کې دننه نوې ټاکنې کول ضروري دي اؤ الیکشن کمیشن ته یې د هیواد صدر سره په مشوره انتخاباتو لپاره دنیټې اعلانولو امر کړی ؤ. دالیکشن کمیشن لخوا دهیواد صدر ته داستول شوي لیک په رڼا کې صدر عارف علوي په دریم مارچ پنجاب اسمبلۍ لپاره د30م اپریل نیټه تجویز کړې وه چې له هغې وروسته الیکشن کمیشن په 30م اپریل دکیدونکو ټاکنو لپاره مهال ویش هم جاري کړی ؤ.
وايس فار بلوڅ مسنګ پرسنز: د نيول شوې بلوڅ ښځې نه د ځانمرګي او بي اېل اېف سره د تړاو بيان په زوره اخېستل شوی
د لادرکه بلوڅانو لپاره غږ پورته کوونکي تنظيم وايس فار بلوچ ميسنګ پرسنز دغه بيان ته په زوره اخستل شوی بيان ويلي، او دعوه یې کړې سي ټي ډي دغه کار د لا درکه بلوڅانو د مبارزې کمزورې کولو په موخه کړی دی.
د ایران د وسلو پروګرام سره د مرستې په لړ کې امریکې د ایران او ترکي په دوو کسانو فرد جرم عاید کړی
په واشنګټن کې د امریکې تحقیقاتي ادارې اېف بي ايي د دفتر یو چارواکي ډېوډ سنډ برګ وویل د مورات بوکي سزا کېدل او په نورو څلورو کسانو فرد جرم د امریکې دا کوښښونه څرګندوي چې څوک هم په غیر قانوني توګه د امریکې تېکنالوجي ایران ته منتقلوي او یا د بندیزونو خلاف ورزي کوي، احتساب به يې کولی شي
"کوچيان د پوليو وايرس وړونکي دي، ماشومان يې باید خامخا وېکسين شي"
کوټه ــــ په پاکستان کې د موسم له بدلېدو سره سم د پنجاب صوبې له ميداني سيمو د افغانستان سرحدي سيمو ته د بلوچستان د موساخېل، شېراني، ږوب او قلعه سيف الله له لارې د کوچيانو راتګ پيل شي، چې د غرونو رغونو پر بېلابېلو لارو پياده مزل کوي. په ږوب کې د ماشومانو د ناروغيو مختصص ډاکټر نعمت الله مندوخېل وايي، کوچيان د پوليو وايرس تر ټولو زيات وړونکي خلک دي. د ډاکټر نعمت الله مندوخېل په وینا په افغانستان کې ممکن داسې سيمې وي، چې ماشومان د پوليو ضد نه وي وېکسين شوي، ځکه نو د کوچي ماشومانو د پوليو پر ضد وېکسين کول ډېر مهم دي: "کوچي ماشومان د پوليو وايرس له يوې سيمې بلې ته وړونکي يا وايرس کېرير بلل کېږي ځکه نو د نورو سيمو ماشومان په وايرس اخته کولای شي". کوچيان د بلوچستان له لارې په کال کې دوه واره د موسم له بدلېدو سره په پسرلي کې او د ژمي په را رسېدو د پنجاب او افغانستان ترمنځ سفر کوي او پر مختلفو سيمو تېرېږي. په کوټه کې د پولیو نېشنل سټاف افسر ډاکټر افتاب کاکړ بيا وايي، چې په بلوچستان کې د افغان سرحدي سيمو پر لارو د ماشومانو د وېکسين کولو تر څنګ له سیند او پښتونخوا سره د بلوچستان پر غزېدلو ټولو لارو هم ماشومان وېکسين کېږي: "د بلوچستان پر ټولو لويو لارو او له افغانستان سره په سرحدي سيمو کې د پوليو ويکسين ځانګړي مرکزونه يا ټرانزټ پواينټس جوړ شوي، چېري چې د پوليو ټيمونه پياده او په ټرانسپورټ کې تلونکي ماشومان د تګ راتګ پرمهال ويکسين کوي". په بلوچستان کې که څه هم له تېرکال راهيسې د پوليو مثبت کېس نه دی رپوټ شوی، خو په پښتونخوا کې د روان کال لومړی ماشوم په ګوزڼ اخته شوی، ځکه نو د غبرګو صوبو تر منځ پر غزېدلو لارو د ويکسين کار هم زيات شوی دی.
څېړونکي: د ايي اېس ايي د بريګېډير وژل کېده د ترهګرو د قوي فعالیت څرګندونه کوي
پاکستان کې څيړونکي وايي، پرون چې په جنوبي وزيرستان کې د پاکستان د استخباراتي ادارې [ايي اېس ايي] بريګیډير مصطفی کمال برکي په یوه نښته کې وژل شوي، دا د امنیتي ادارې دپاره غټ تاوان دی او بل طرف ته دا څرګندونه هم کوي، چې ترهګر او د هغوی استخباراتي نېټ ورک هم فعال دی.
د خوراک نړیواله اداره: کېدای شي سږ کال د افغانستان ځینې برخې له کاختۍ سره مخ شي
واشنګټن ــــ د خوراک نړیواله اداره وایي د ډونر یا بسپنه ورکوونکو هېوادونو د مرستو کمېدل کېدای شي سږ کال د افغانستان ځینې برخې له کاختۍ سره مخ کړي او تر نهو میلینه پورې افغانان به د خوراکي توکو له مرستو بې برخې پاته شي. د ډبلیو اېف پي دفتر وایي دوی د مارچ او اپریل میاشتو لپاره د 93 میلین ډالرو له کمښت سره مخ دي او د راتلونکو شپږو میاشتو لپاره 800 میلینه ډالرو ته اړتیا لري. د خوراک نړیوالې ادارې پر خپله ویبپاڼه د مارچ پر 20مه په خپاره کړي رپوټ کې ویلي چې د فنډ د کمښت له کبله یې د څلور میلینه افغانانو لپاره راشن کم کړی او د هغوی له اړتیا سره سم 50 فیصده خوراکي مواد به ورکول کېږي. په افغانستان کې د خوراک د نړیوالې ادارې مشره شا وې لي وایي، که په راتلونکو اوونیو کې د فنډ لپاره ورسره شوې ژمنې پوره نه شوې نو د دې هېواد نور نهه میلینه خلک به راتلونکې میاشت هیڅ ډول خوراکي مرستې تر لاسه نه کړای شي: "په دې میاشت کې به څلور میلینه خلک یو څه مرستې ترلاسه کړي خو په اپرېل کې به نهه میلینه خلک هیڅ ډول مرستې تر لاسه ن کړي. شپږ میلینه خلک کاختۍ ته نیژدې شوي دي، موږ دومره وسایل نه لرو چې د دغو شپږو میلینه خلکو خدمت وکړو". رویټرز وایي په 2021م کال کې چې طالبان پر افغانستان واکمن شول او بهرنیو حکومتونو لا خپل پرمختیایي فنډونه نه وو کم کړي او بندیزونه نه وو لګېدلي د بشردوستانه مرستو لوی پېکیج هغه مهال د پراخې کاختۍ په مخنیوي کې مرسته وکړه، خو وایي اوس دا وېره بیا په زیاتېدو ده. د خوراک د نړیوالې ادارې تر دې خبرداري مخکې نړیوالو چارواکو هم خبرداری ورکړی وو چې په نړۍ کې زیاتېدونکی بیړنی حالت او له چېلنجونو سره مخ اقتصادي حالت پر ښځو د طالبانو له بندیزونو سره یو ځای کولای شي ډونران له افغانستان سره له مرستو پر شا کړي. د ډبلیو اېف پي مشره شا وې لي وایي د طالبانو د چارواکو هغه پرېکړه یو "ویجاړونکی ګوزار" دی چې په تېره دسمبر میاشت کې یې په غیرسرکاري ادارو کې افغان مېرمنې له کاره منع کړې: "د خوراکي توکو مرستې په داسې وخت کمېږي، چې افغانان له یو بل یخ ژمي را وتلي او یو په بل پسې بحرانونو ستړي کړي دي. که بشردوستانه مرستې دوام ونه کړي، په لکونو نور افغانان به د ژوندي پاتېدو لپاره مرستو ته اړتیا ولري". 33 کلن خیرمحمد اووه کاله مخکې په هلمند کې د ماین په چاودنه کې پښه بایللې وه او یو له هغو کورنیو څخه دی چې مرستو ته سخته اړتیا لري. خیر محمد رویټرز ته ویلي چې د نړیوالو خوراکي مرستو کموالی به کاختي جوړه کړي. د ملګرو ملتونو د مالي ریکار له مخې، ډبلیو اېف پي تېر کال د افغانستان لپاره له لسګونو حکومتونو او ادارو شاوخوا 1.7 ارب ډالر تر لاسه کړي وو، چې زیاته برخه یې امریکې، برتانیې او جرمني ورکړې وه، خو دا نه ده معلومه چې سږ کال کوم هېوادونه یا ادارې مرستې کموي.
د شام د دفاع وزارت: د اسرایل په حمله کې د حلب هوايي اډې ته نقصان رسېدلی
ای اېف پي وايي په 2011 کې په شام کې خانه جنګۍ د شروع کېدو نه پس اسرایل په ګاونډې ملک کې په سلګونو حملې کړي چې په کې د شام د پوځ او د شام ایران پلوه اتحادیانو او د حزب الله هدفونه شامل دي
چيف جسټس: د اډيو ټېپونو د لارې سپريم کورټ بدنامول کيږي
د پاکستان د سپريم کورټ چيف جسټس عمر عطا بنديال ويلي، سپریم کورټ اييني اداره ده خو د اډيو ټېپونو یا د مبینه ريکارډ غږيز پېغامونو د لارې بدنامول کيږي.
اوکرایني چارواکي وايي د روس ډورن حملې په کییف سیمه کې درې تنه وژلي
د روس صدر ولادیمير پوټن د نهې، سه شنبې، په ورځ په ماسکو کې د چین صدر شي جېن پېنګ د هرکلي په وخت په اوکراین کې امن دپاره د چین د مجوزه منصوبې هرکلی وکړو. پوټن دا خبره تکرار کړه چې اوکراین او مغربي اتحادیان یې په امن مذاکراتو کې دلچسپي نه لري
ډیره اسماعیل خان:نښته کې درې پوځیان اؤ درې ترهګر وژل شوي دي
دپاکستان پوځ وایي دخېبر پښتونخوا په ډیره اسماعیل خان سیمه کې ترهګرو سره په نښته کې درې پوځیان وژل شوي اؤ دوه نور ژوبل شوي دي. پوځ دعوه کړې ده چې دې نښته کې درې ترهګر هم وژل شوي دي. دپوځ مطبوعاتي څانګې ایي ایس پي ار پخپل بیان کې ویلي چې دا نښته د ګل او نهې په منځ شپه کې وروسته له هغې شوې ده چې د ډيره اسماعیل خان په کهوټي سیمه کې ترهګرو دپولیسو په یو چیک پوسټ حمله وکړه اؤ پوځ دغه ترهګر په سګو سیمه کې را ایسار کړل. پوځ ویلي په دغه مهال دترهګرو اؤ پوځ ترمنځ سختې ډزې وشوې چې پکې درېواړه ترهګر وژل شوي دي. دپوځ دبیان له مخې نښته کې درې پوځیان حوالدار محمد اظهر اقبال،نایک محمد اسد اؤ سپاهي محمد عیسا وژل شوي اؤ د اصغر اؤ حذیفه په نومونو دوه نور پوځیان سخت ژوبل شوي دي. دپوځ بیان کې دعوه شوې ده چې د وژل شوؤ ترهګرو د ولکې نه یې وسلې اؤ چاودیدونکي مواد هم ترلاسه کړي دي . بیان کې ویل شوي چې پوځ هیواد نه دترهګرو نوغي ویستلو ته هوډمن دی اؤ دپوځي ځوانانو داسې قرانۍ دپوځ ولولې نورې هم پیاوړې کوي. دا په داسې حال کې ده چې تېره ورځ دافغانستان دپولې ترڅنګ دجنوبي وزیرستان په انګور اډه سیمه د وسله والو په یو برید کې دپاکستان داستخباراتي ادارې ایي ایس ایي یو لوړپوړی افسر برېګېډیر مصطفی کمال برکي اؤ دهغه ډرایور هم وژل شوي دي. پوځ بیان کې ویل شوي چې انګور اډه کې ترهګرو سره شوې دې نښته کې دبرېګېډیر مصطفی کمال برکي اؤ دهغه ډرایو د وژل کیدو ترڅنګ د وژل شوي بریګیډیر د لاس لاندې ډلې اوه (۷) کسان زخمیان شوي هم دي چې د دوو حالت پکې نازک ښودل شوی دی. ځایي استخباراتي سرچینو وي او اې ډیوه ته ویلي چې برېګېډير برکي دا ځل افغانستان ته د امن په یو مشن تللی و، مګر دا واضحه نه ده چې په داسې وخت کې پاکستان په څه قسمه امن مشن بوخت دی او افغانستان ته به د هغه د تګ اصلي مقصد څه و؟ دیاد استخباراتي افسر د وژنې ذمه واري تر دې دمه چا پغاړه نه ده اخستې. په پوځ دا وروستي بریدونه په داسې حال کې شوي چې اوړمه ورځ پاکستاني رسنیو پاکستان ته دافغان طالبانو دیو پلاوي دخفیه سفر دعوې کړې دي اؤ وایي په دې سفر کې پاکستاني چارواکو افغان طالبانو سره دټي ټي پي دسیوا شوؤ بریدونو په اړوند خبرې کړې دي. خو نه هم لا پاکستان په دې اړه په رسمي کچه څه ویلي دي اؤ نه افغان طالبانو دې دعوؤ ته کوم غبرګون ښکاره کړی دی. پاکستان کې چې په دې وروستیو کې په امنیتي ځواکونو څومره بریدونه شوي هغې کې د زیاترو پړه ټي ټي پي پغاړه اخستې ده
