د طالبانو ادعا: د حکومت په رسمیت پیژندلو کې مو تر ټولو ستر خڼد امریکا ده
په افغانستان کې طالبانو ادعا کړې چې متحده ایالات د دې ډلې د حکومت په رسمیت پیژندلو کې تر ټولو ستر خنډ دی.
طالبان چې څه باندې لس میاشتې کیږي په افغانستان کې یې واک تر لاسه کړی تر اوسه د نړي هیڅ یو هیواد یا ادارې یې سرپرست حکومت په رسمیت ندی پيژندلی.
د یوې پوښتنې په ځواب کې چې آیا د دې ډلې پالیسۍ او یا کوم هیواد د دې سبب شوی چې تر اوسه دا ډله هیچا په رسمیت نده پیژندلې، ذبیح الله مجاهد وویل چې "زما په فکر تر ټولو ستر خنډ متحده ایالات دي" چې د هغوي مشروعیت یې ځنډولي.
ښاغلي مجاهد دا څرګندونې د WhatsApp د یو ګروپ له لارې خبریالانو ته کړي چې همدا ډله یې چلوي.
مجاهد ویلي، " هغه (امریکا) نور هیوادونه نه پریږدي چې پدې لورې قدم واخلي او پخپله یې هم کوم اقدام ندی کړی. تر کومه ځایه چې د بهرنیو لخوا د مشروعیت مسله ده ، زه فکر کوم تر ټولو ستر خنډ متحده ایالات دي".
د طالبانو دې ویاند همدرانګه ادعا وکړه چې د دپلوماتیک رسمیت پیژندلو لپاره د هغوي حکومت ټول شرایط پوره کړي او پدې یې هم ټینګار وکړ چې د متحده ایالاتو په ګډون ټول هیوادونه باید دا درک کړي چې د طالابنو سره سیاسي تعامل د ټولو په ګټه دی.
هغه وویل، "دا به نړۍ ته اجازه ورکړي چې خپل شکایتونه په رسمي توګه د طالبانو سره شریک کړي".
د طالبانو دې جګپوړي چارواکي همدارنګه وویل چې د جګړې پر وخت یې د متحده ایالاتو سره دښمني وه خو دا چې اوس جګړه پای ته رسیدلې، طالب مشران د دوحې د سولې د تړون له مخې د متحده ایالاتو سره غوره دوه اړخیزې اړیکې غواړي.
سره لدې چې طالبان ادعا کوي د نړیوال مشروعیت لپاره یې ټول شرایط پوره کړي خو د متحده ایالاتو په ګډون نړیوالې ټولنې طالبانو ته شرط ایښی چې که په رسمیت پیژندل غواړي باید داسې حکومت جوړ کاندي چې د افغانستان ټولو سیاسي ګوندونو،میرمنو او مذهبي او قومي اقلیتونو ته پکې برخه ورکړل شوې وه.
د طالبانو لپاره بل شرط دا هم دی چې باید د میرمنو او نجونو د حقونو په ګډون د ټولو افغانانو بشري حقونو ته درناوی ولري.
د طالبانو د کابینې ډیری غړی پښتانه او ټول یې نارینه دي. طالبانو همدارنګه واک ته تر رسیدو وروسته د افغان میرمنو په ورځني ژوند، کار کولو او تعلیم ګڼ شمیر محدودیتونه او بندیزونه وضع کړي. لا تر اوسه هم د هیواد په ګڼ شمیر سیمو کې د افغان نجونو لپاره تر شپږم ټولګي پورته ښوونځي تړل شويدي.
طالبانو همدرانګه په ځینو حکومتي ادارو کې د میرمنو د کار کولو مخه نیولې. په میرمنو د محدودیتونو په تازه اقدام کې طالبانو افغان میرمنې چې حجاب نکوي د "حیواناتو" سره پرتله کړې.
د طالبانو امر بالمعروف د کندهار ښار پر سرکونو لوحې لګولي او پرې لیکل شوي، کومې ښځې چې اسلامي حجاب نه کوي "له حیواناتو سره د مشابهت هڅه کوي".
یوه میاشت مخکې د طالبانو مشر هیبت الله اخندزاده فرمان صادر کړ چې ښځې باید عموما پر کور پاتې شي او په بیرون کې باید مکمل حجاب وکړي.
په همدې روانه اونۍ کې، د امر بالمعروف له خوا د کندهار ښار په لارو کوڅو کې لوحې لګول شوي چې پرې په حجاب او چادرۍ کې د ښځو عکسونه کښل شوي او لیکل شوي چې "مسلمانه ښځه د حجاب په نه مراعت کولو سره له حیواناتو سره د مشابهت هڅه کوي".
ذبیح الله مجاهد هم په افغان میرمنو د محدودیتونو دفاع وکړله او زیاته یې کړه چې په میرمنو دا بندیزونه د شرعیت مطابق دي او پرته لدې چې نور جزیات ورکړي زیاته یې کړه چې د شرعیت تطبیق کول د طالبانو مسؤلیت دی.
هغه وویل، " هیله لرم چې افغان میرمنې د هغو شیانو تقاضا ونکړي چې د اسلامي اصولو خلاف دي".
افغانستان کي د القاعدي شتون
د طالبانو ویاند ادعا وکړه چې اوس مهال په افغانستان کې القاعده شبکه او هیڅ غړي یې نشته او د ۲۰۰۱ کال د اکټوبر په میاشت کې چې متحده ایالاتو په افغانستان یرغل وکړ، القاعده او غړي یې هم د افغانستان څخه ووتل.
طالبان پداسې حال کې د القاعدې شتون ردوي چې ملګرو ملتونو په تازه راپور کې ویلي چې د طالبانو او القاعده شبکې ترمنځ اړیکي هم نږدې پاتې دي او د القاعدې شبکې مشر ، د طالبانو د مشر ملا هبت الله اخندزاده بیعت تازه کړی دی.
په راپور کې راغلي چې د ملګرو ملتونو د غړو هیوادونو ارزونې ښيي چې القاعده د طالبانو تر واک لاندې خوندي پټنځایونه لري او ددې شبکې غړي په افغانستان کې د فعالیت ازادي لري.
ملګرو ملتونو ویلي دي چې د تیر کال د اګست په ۱۵ نیټه په افغانستان کې د طالبانو په واکمنیدو سره د القاعدې مشر ایمن الظواهري یو شمیر پیغامونه ثبت کړي دي او ددغو پیغامونو ریکارډ کول ښیي چې د القاعدې مشر د ۲۰۲۲ کال تر فبرورۍ پورې ژوندی و.
