د مرګونې شخړې دوه ورځې وروسته د سپین بولدک – چمن پوله لا هم تړلې ده
د طالبانو او پاکستاني امنیتي ځواکونو ترمنځ د جګړې دوه ورځې وروسته لا هم د سپین بولدک او چمن د تګ راتګ لار بنده ده او نن د شنبې په ورځ فبرورۍ ۲۶ (کب ۷) په سلګونو مسافر ایسار پاته دي.
په سپین بولدک کې یو پاکستاني امنیتي چارواکي فرانس پرس خبري اژانس ته ویلي چې «سرحد د مسافرو او همداشان د سوداګرۍ پرمخ تړلی دی.» هغه زیاته کړې چې «د قومي او مذهبي مشرانو او مخورو یو پلاوی ټاکل شوی چې د طالبانو سره خبرې وکړي.»
خو د کندهار د والي ویاند محمود اعظم د فرانس پرس اژانس ته ویلي چې تر اوسه خبرو کومه نتیجه نده ورکړې: «دوی هڅه کوي چې بیا خبرې وکړي...خو که نتیجه ورنکړي په موضوع به په لوړه کچه بحث وشي.»
دوه ورځې مخکې په سپین بولدک کې د طالبانو امنیتي کسانو او پاکستاني امنیتي ځواکونو ترمنځ جګړه شوې وه چې په کې لږ تر لږه درې تنه وژل شوي وو.
د طالبانو د حکومت ویاند ذبیح الله مجاهد د پنجشنبې په ورځ دغه نښته تائید کړه، خو پاکستاني لوری یې د جګړې په پیلولو تورن کړ. هغه په ټویټر کې لیکلي و «د کندهار په سپین بولدک کې له پاکستاني ساتونکو سره یوه محلي ستونزه پیښه شوې، متاسفانه چي لومړۍ ډزي د پاکستاني ساتونکو له لوري شوي دي.»
ښاغلي مجاهد زیاته کړې وه چې اوس «حالات کابو» شوي او «موږ به په دې اړه بشپړه پلټنه وکړو چې دا پیښه ولې رامینځته شوې» ده.
د فرانس پرس اژانس د رپوټ له مخې په افغانستان کې د طالبانو د بیا واکمن کیدو راهیسې د پاکستان سره سرحدي کړکیچ زیات شوی، پاکستان تور لګوي چې وسله والې ډلې د افغانستان له خاورې څخه پر پاکستان بریدونه پلان کوي. طالبانو پاکستاني وسله والو ډلو ته په افغانستان کې پناه ځای ورکول رد کړي خو په عین وخت کې د پاکستان له لورې د ډیورند پر کرښه د موانعو او کتارو له لګولو سره یې مخالفت کړی دی.
پاکستان د افغانستان د جمهوري نظام پر وخت هم دا ډول ادعاوی کولې چې تل افغان حکومت دا ډول ادعاوی رد کړي او ویلي وو چې «پاکستان د طالبانو په ګډون ترهګرو ډلو ته په خپله خاوره کې پناه ورکړې او ددې هیواد استخبارات او پوځ دغه ډلژ تجهیز او تمویلوي.
د فرانس پرس اژانس وایي خبریالانو یې په سلګونو کسان لیدلي چې د پاکستان لور ته د چمن د سرحدي دروازې مخ ته د لارې پرانست کیدو انتظار باسي.
ددغه سرحد له لارې هره ورځ په زرګونو کسان تیریږي چې په کې سوداګر، هغه ناروغان چې پاکستان ته د درملنې لپاره ځي او همداشان هغه کسان شامل دي چې د خپلوانو لیدنې لپاره ځي.
