تیر۲۴ ساعتونه؛ افغانستان کې د کرونا ۳۵ مثبتې پېښې ثبت شوي
د افغانستان د عامې روغتیا وزارت وايي په تیرو ۲۴ ساعتونو کې په هېواد کې د کرونا ویروس ۳۵ مثبتې پېښې ثبت شوي دي.
روغتیا وزارت نن یکشنبه سپټمبر ۲۷ (تله شپږمه) ویلي چې په تېرو ۲۴ ساعتونو کې د کرونا ویروس د ۲۶۷ مشکوکو سمپلونو معاینات شوي چې ۳۵ یې مثبت ثابت شوي دي.
د افغانستان د روغتیا وزارت د معلوماتو په اساس په دې سره په دغه هیواد کې د کرونا ویروس د ټولو مثبتو پېښو شمېر ۳۹۲۲۷ ته ورسېد.
د یاد وزارت د معلوماتو په اساس تر دامهاله په دغه هیواد کې له کرونا ویروس څخه ۱۴۵۳ تنه مړه شوي دي.
د رسمي شمېرو له مخې تر اوسه په افغانستان کې له کروناویروس څخه ۳۲۶۴۲ تنه بیرته جوړ شوي دي.
د افغانستان روغتیا وزارت تر دې مخکې ویلي وو که روغتیايي لارښوونې مراعت نشي د هوا په سړېدو سره د کروناویروس د یو بلې څپې راتلو امکان شته.
کرونا ویروس د لومړي ځل لپاره د ۲۰۱۹ کال په ډسمبر میاشت کې د چین هیواد د هوبي ایالت په ووهان ښار کې پیدا شو او بیا ټولې نړۍ ته خپور شو.
د امریکا د جانس هاپکینز پوهنتون د معلوماتو په اساس تر دا مهاله په نړۍ کې څه باندې ۳۲ میلیونه کسان په کرونا اخته شوي او څه باندې ۹۹۴زره نور ورڅخه مړه شوي دي.
