امریکا کې له کورونا وېروس د مړو شمېر ۲۴۸۹ ته ورسېد

د جان هاپکنز پوهنتون د شمېرو له مخې امریکا کې د یکشنبې تر ماښام د کورونا له امله ۲۴۸۹ کسان مړه شوي او ۴۷۶۷ کسان ترې روغ شوي دي.

د امریکا له نیویارک ایالت رپوټونه وايي، تېرو ۲۴ ګړیو کې په دغه ښار کې د کورونا وېروس له امله ۲۳۷ کسان مړه شوي او دې سره دغه ایالت کې د مړه شویو شمېر ۹۶۵ ته ورسېد.

د نیویارک والي اینډریو کومو وايي، یوه ورځ کې په دغه ایالت کې ۷۱۹۵ کسان نوي په کورونا اخته شوي دي.

نیویارک په امریکا کې د کورونا د خپرېدو مرکز دی او د امریکا پنځوس سلنه کورونا وهلي په دغه یاالت کې دي.

نیویارک د امریکا د ټولو ایالتونو د ۴۰ سلنه مړینه جوړوي چې له کورونا پېښه شوې ده.

امریکا کې یو لک څلوېښت زره کسان په دې ویروس اخته شوي دي.

دې شمېر ته په پام اوس تر ټولو ډېر کسان په امریکا کې په کورونا اخته شوي دي.

نړۍ کې ۱۵۱ زره کسان هم له دې وېروس جوړ شوي دي.

له بلې خوا د امریکا ولسمشر ډونلډ ټرمپ د کورونا ویروس د نه خپرېدو لپاره په دغه هېواد کې محدودیتونه د اپرېل تر اولې وغځول.

ولسمشر پخوا ویل چې د اپرېل پر نهمه د ایسټر اختر تر ورځې به دا محدودیت وي، خو اوس یې خپله پرېکړه بدله کړې ده.

نوموړي د یکشنبې په ورځ وویل، کارپوهانو ورته ویلي چې راتلونکو دوو اونیو کې به د کورونا له امله د مړو شمېر ډېر زیات شي، خو له هغه وروسته تمه ده چې دا مړي او ناروغان کم شي.

له بلې خوا د امریکا د کورونا ضد ادارې مشر وايي، ممکن نږدې یو لک کسان امریکا کې د کورونا وېروس له امله خپل ژوند له لاسه ور کړي.

ډاکټر انټوني فایوچي دا هم ویلي، ممکن تر دوو لکو کسان دغه هېواد کې له کورونا مړه شي.

هغه له سي اېن اېن سره خبرو کې زیاته کړه، په امریکا کې به په میلیونونو کسان په کورونا اخته شي.

په دا مهال د امریکا د ډېرو ایالتونو او ښارونو چارواکي له دې وېروس سره د مقابلې لپاره د مهمو طبي وسیلو د کمښت خبره کوي.

د نیویارک ښاروال ویلي چې د مصنوعي تنفس د الو په ګډون له کورونا سره د مقابلې مهم طبي وسایل تر یوې اونۍ ختمېږي.

بېل ډي بلازیو دا هم ویلي، چې د دې ښار وضعیت "د جګړې د وخت" په څېر دی.

د یکشنبې تر مازیګر ۳۳ زره اته سوه کسان په نړۍ کې د کورونا له امله مړه شوي او تر اوو لکو او شل زرو کسان پرې اخته شوي دي.

نړۍ کې تراوسه په کورونا ۷ لکه ۲۲ زره ۲۸۹ کسان په کورونا اخته شوي دي.

امریکا کې ۱۴۲۱۰۶ له کورونا اغېزمن او ۴۷۶۷ ترې جوړ شوي

ایټالیا ۹۷۶۸۹ له کورونا اغېزمن او ۱۳۰۳۰ ترې رغېدلي

چین ۸۲۱۲۲ له کورونا اغېزمن او ۷۵۵۸۳ ترې رغېدلي

اسپانیا ۸۰۱۱۰ له کورونا اغېزمن او ۱۴۷۰۹ ترې رغېدلي

جرمني۶۲۰۹۵ له کورونا اغېزمن او ۹۲۱۱ ترې رغېدلي

فرانس ۴۰۷۲۳ له کورونا اغېزمن او ۷۲۲۶ ترې رغېدلي

ایران ۳۸۳۰۹ له کورونا اغېزمن او ۱۲۳۹۱ ترې رغېدلي

برتانیا ۱۹۷۸۴ له کورونا اغېزمن او ۱۵۱ ترې رغېدلي

سویزرلنډ ۱۴۸۲۹ له کورونا اغېزمن او ۱۵۹۵ ترې رغېدلي

نیدرلنډ ۱۰۹۳۰ له کورونا اغېزمن او ۲۵۲ ترې رغېدلي