ډېوې نا هيلې شوې د هيلو تر مزاره نه ځي
بورا په پرې وزرو پروت دى تر ګلزاره نه ځي
 
زما په خوله اوس لېوني هم لا باور نه كوي
هر څو بغارې كه وهمه تر هوښياره نه ځي
 
هم مې ګناه هم مې قصور كړى مجرم يمه زه
نا مرده غاړه سرزوري كوي تر داره نه ځي
 
د ګران وطن د سوځېدو يې هلې ځلې وكړې
د اور لمبې به يې نو ولې تر اغياره نه ځي ؟

تا به ضرور وي ځورولى چې منكر شو درنه
ماشوم زړګى مي نور له تا سره پر لاره نه ځي

ته به يې بولې مسيحا خو پرې تېر وتى يې ډېر
حقمله لاس يې ستا تر زخم او پرهاره نه ځي .