تا مي د راز خبره څرنګه بربنډه وكړه

 قاضي تا دا فيصله هم د ځان په ونډه وكړه
په ما دي خپل ورور كړ شهيد او تا يې كونډه وكړه
 
 ما خو ليدې كښته مي وكتل خجله شومه
چې له ميدانه د غيرت دي اشنا منډه وكړه
 
يو ورځ به ستا تر ګرېوان ورسي مظلوم لاسونه
تا د يتيم له ماله ولي غټه پنډه وكړه ؟

ما ته په حق ويلو هم په خوله لاسونه راږدې
تا مي د راز خبره څرنګه بربنډه وكړه
 
تا د رقيب په مخ كې ما ته په ورورۍ وخندل
ما ته دي دا خندا له زړه كه په ملنډه وكړه ؟

چې دغه ستا په جنازه كې شريك نه شوم نصرت
شهيده دا كمزوري ما د وخت له ځنډه وكړه