مينه

رنګين سپرلى وي چې د نورو په طرف وردرومي
سپېره خزان شي چې زمونږ خوارانو كور ته راځي

خدايه د چا په دربه وكړمه سلام د مينې
په دې وطن كې هيڅوك نه مني پيغام د مينې

په سپينه ورځ مې د ګلانو هار ستا غاړې ته ووړ
خو چې زه تا ته رسېدمه وو ماښام د مينې

هم دى قاتل د محبت هم يې په زړه كې مينه
دغه چې څلي نړوي په احترام د مينې

راځۍ چې ټول نيتونه وتړو د مينې په نوم
خداى مهربان دى چيرې رابه شي امام د مينې

بس چې جواب ستا له كوڅې شو ها وړوكى رويبار
د فروتن په هغه ورځ وو اختتام د مينې