راليږونکی :عزیزالرحمان نیازی
د راليږونکي پته :azizurahman_niazai33@yahoo.com
نيټه : 24-02-2009


خدایه دا څوک دی!
چې په خوب کې راځي
زما د زړه په دشته
خواږه دردونه کري
زه یې سندرې کړمه
غواړم چې ور یې کړمه
خو
هغه د تل لپاره
زما له الهامي خوبونو
بیرته لاړ شي
»»»»»
خدایه دا څوک دی!
چې زما په شپو کې
لکه د ستورو او سپوږمۍ په څیر
سپینه رڼا خوروي
غواړم چې لاس ورواچوم
غواړم چې وې نیسمه
خو
د زمانې وریځو ته
بیرته پناه یوسي
»»»»»
خدایه دا څوک دی!
چې زما د سندرو
کتابو کې اوسي
زه یې په پاڼه، پاڼه لولم خو
د اسم اعظم په څیر یې
راځینې نوم ورک دی
»»»»»
خدایه زه نه پوهیږم
چې لاشعور کې زما
څه رنګ ښکلا پرته ده!
چې زه په تورو کې
د هغې نوم هم ځایولی نشم
نو
خدایه زه نه پوهیږم
چې زه پر چا مین یم
چې زه پر چا مین یم

پای
د سلواغې ۱۹مه ۱۳۸۷کال
د جلال آباد ښار