برند باڼه يې د پيچکو ناز ته ناڅي
نن يې زړه کوم ګلورين اغاز ته ناڅي
ستا له سوی به حقيقت لري په پام کې
چې مين دې په څرخو مجاز ته ناڅي

سپين کالۍ نجلۍ راګوري خدای دې خير کړي
د سخي صاحب کوتره باز ته ناڅي

زه چې ښکته شم د شپې اخړي پوړ ته
د ژوند ډمه مې د فکر ساز ته ناڅي

دنګ جلان په خپل شډل بډل خوی پريږدئ
ليونی د خپلې خولې اواز ته ناڅي

څلوريزه
( حميد شجاع ته ډالۍ )
زما ګلرنګ زما په ليدو په ځان کې داسې ورک شي
لــــکه ماهـــي چـــې تـــل تـــه لويږي د اوبو لــــه بامـــه
شـــــاعر جــــــانان مــــې ماښامــونو پسې ډير لګيږي
خدايزده څه ټکه پرې لوېدلـــــې ده د شپو لــــه بامــه