ما سره ټکى نشته

اسیر منګل

چې مناسب وى ستا د شان ما سره ټکى نشته
چې ستا لوئى کړمه بيان ما سره ټکى نشته

زۀ ستا په فضل يم ژوندے زۀ نوره هېڅ هم نه يم
ما نه وا نه خلې امتحان ماسره ټکى نشته

ستا د ادراک پړدې سپړدل د هر چا کار خو نۀ دے
حمد ته دې خوښ کړم کوم عنوان ما سره ټکى نشته

دومره غريب چرته زۀ ستا په بادشاهۍ کښې نۀ وم
خاندى نن ما پورې جهان ما سره ټکى نشته

خدايه! چې تاته مې نزدې کړى را ئې وړم له کومې
د ژوند په دشته يم حېران ما سره ټکى نشته