غزل

چیرته یې ویسم او په چا یې څه چاره وکړمه ؟
پرې ، چې د خپل زړه د زخمونو ننداره وکړمه

یوه خندا د چا بس کیږي؟ خو بې وسه یمه
ځه مړه خیر دی په همدې به ګذاره وکړمه

اوس هسې راغلم چې احوال دې د زړګي واخلمه
شپه دې په خیر شي ، شپه به بل وخت درسره وکړمه

منکره هم نه شوه ؛ خو دومره یې سلګو کې وویل
ستا په یارۍ باندې به فکر دوباره وکړمه

د غزل راز به لږ په رمز او کنایه کې وایم
خوند به یې لاړ شي که خبره یې ښکاره وکړمه

جلاله پته یې د کور که رانه وغوښته نو
په پټو سترګو به یې زړه ته اشاره وکړمه

جلال امرخېل