غزل / جلال امرخېل

غزل

رانازله څه بلا ده ، کربلا ده ،کربلا ده
پر وطن خوره غوغا ده ، کربلا ده ،کربلا ده

اور شوه ځمکه ، که فضا ده ، کربلا ده ،کربلا ده
په ژړا په واوېلا ده ، کربلا ده ،کربلا ده

د يارانو ايمانونه ، ځان ته وړاندې نه مالوم کړه
چې سودا د سر سودا ده ، کربلا ده ،کربلا ده

يزيدي باڼه رانېغ شول ، حسيني زړه ته مې خير کړې
هره ساه مې وارخطا ده ، کربلا ده ،کربلا ده

که کوفه ده ، که بصره ده ، که کابل دی ، که هلمند
کربلا ده ، کربلا ده ، کربلا ده ،کربلا ده

بيا ماشومې ارزوګانې د انکار چړو زخمي کړې
بيا د ظلم انتها ده ، کربلا ده ،کربلا ده

د جلال د زړه حسرته ! محبته ! تر قيامته
له قسمته چې په تا ده ، کربلا ده ،کربلا ده

جلال امرخېل