غزل

تا ته په خندا غزل
ما ته په ژړا غزل 

جوړ شي ترې اعلی غزل
لیکم چې په تا غزل

ژوند ته لکه ساه غزل
رنځ ته مې دوا غزل

اوه کرښې ځواب غواړم
شابه راته را غزل

زه یم لکه ستا سلګۍ
ته لکه زما غزل

شپه شوه پر څنګل رڼه
لیکم به سبا غزل

وې ویل چې رسوا به شو
نشر نه کړې دا غزل

ما نه مروره ده
ما سره پخلا غزل

بیا مې جوړ بایللی زړه
وایمه چې بیا غزل

ستا د بنګړو شرنګ ټپه
ستا د زړه درزا غزل

لګي لکه ستا باڼه
زړه باندې رسا غزل

چوپ شوم ، ته ګیله کوه
وایه ، بسم الله ، غزل

څوک چې تنقید نه مني
نه منو د چا غزل

ما وې د زړه درد مې دی
خلکو وې واه واه ، غزل

جلال امرخېل