غزل / جلال امرخېل

غزل

ماحول که هر څو لمبه کړی ستا کرم  هم دی
راوریدلی پر ګلانو خو شبنم هم دی

یوازې تا ته مې شاعر احساس سلګۍ نه وهي
ګرانې پر سر باندې مې پروت د وطن غم هم دی

جفا هم تا وکړه ، بې ننګه دې هم زه یاد کړمه
ژړا هم ته کوې ، مات کړی دې قسم  هم دی

رقیب مې ستا له لاسه بدې شي د سپي له مرګه
خو ستا په مینه راته خدایږو محترم هم دی

د رغیدو نه یم ، څهرې ته مې ائینه مه نیسه
ما خپل نصیب پسې کتلی جام د جم  هم دی

د زړه ضربان مې که الله ، الله نارې وهلي
د زړه په کونج کې مې پاللی یو صنم هم دی

جلاله ! ما د بیلتانه ناکردې هم ولیدې
پر ما تیر شوی له قیامت نه لوی ماتم هم دی

جلال امرخېل