سړی او نړۍ

 

پلار يې ورځپاڼه لوسته. مګر کوچنی زوی يې ورته مزاحمت کاوه. حوصله يې ختمه شوه. د ورځپاڼې همغه پاڼه يې چې د نړې نقشه په کې وه، پرې کړه او ټوټې ټوټې یې کړه. خپل زوي ته يې ورکړه او ورته يې وویل: راشه زویه! درسره کار لرم. د نړۍ یوه نقشه درکوم. ويې ګوره! کولای شئ چې همغسې يې جوړه کړئ چې څنګه وه؟

پلار يې بېرته په خپل کار بوخت شو. پوهېده چې زوی به يې څو ساعته په دغه کار لګیا وي. مګر پاو وخت وروسته يې زوي له جوړې شوې نقشې سره بېرته راستون شو.

پلار يې په تعجب سره پوښتنه وکړه:

- مور دې درته جغرافیه ښودلی دی؟

زوی ځواب ورکړه:

- جغرافیه؟ یعنی څه؟

پلار يې پوښتنه وکړه:

- څنګه دې وکړای شو چې دغه د نړۍ نقشه جوړه کړئ؟

زوي وویل:

- ددغې پاڼې شاته د یوه سړي تصویر وو. کله چې مې وکړای شو چې هغه سړي جوړ کړم، نړۍ مې هم جوړه کړه.

 

ژباړن: شیرین اغا جهانګیر

رباط سنګي هرات

۲۴-۰۲-۲۰۱۰