نن دوشنبه، د ۲۰۱۰ کال د فیبرورۍ په ۲۲ نېټه د هرات ولایت د کشک کهنې ولسوالۍ د درزک په سیمه کې د دولت د مخالفینو او د پولیسو ترمنځ سخته نښته وشوه. پېښه هغه وخت رامنځ ته شوه چې د پولیسو قطار چې امریکايي ځواکونه يې ملتیا وکوله، د کشک کهنې نه د رباط سنګي لورته په حرکت کې وو چې د مخالفینو د کمین سره مخامخ شول. د پېښې په پایله کې یو تن پولیس او یو تن مخالف ووژل شول او د پولیسو په وینا ډېر نور مخالفین سخت ټپي شوي دي.

د یو تن کلیوال د وینا پر بنسټ چې د خپل نوم له څرګندولو نه يې ډډه وکړه، وویل چې وژل مخالف تن د هرات پوهنتون محصل وو او په دې نږدې وختونو کې د طالبانو له ډلو سره یو ځای شوی وو. یاده دې وي چې دغه دوه ولسوالۍ په تېرو څو میاشتو کې د سختو پېښو شاهد ول.

۲۲-۰۲-۲۰۱۰

شیرین اغا جهانګیر

رباط سنګي هرات