سوال
ماښام خټک
د نړۍ مسلمانانو
لوي اختر دی لویه ورځ ده
لوي اختر د قربانو وي
تاسو ټول چړې په لاس یې
د څاروو مرۍ کټ کیږي
سرې سرې وینې سرې سرې غوښې
د الله په نوم بهیږي ،تقسمیږي
د نړۍ مسلمانانو
لوي اختر دی لویه ورځ ده
د نړۍ مسلمانانو!
قرباني که نوم د وینو بهیدو وي
قرباني که نوم د غوښو پریکوو وي
قربانۍ کې که کټ کیږي په تنو ولاړ سرونه
د نړۍ مسلمانانو!
لوي اختر دې لویه ورځ ده
زه پښتو ن یم
نو دا ستاسو خیال به څه وي
زه په دې سوچ کې ولاړ یم
چې په ما قرباني کیږي ؟
