د لوی، مهربان او بخښونکي خدای په نامه

ځان وژونکي ته

عالمزېب نثار 29.09.2007 01:00

نادان کم عقل يې خپل ځان وژنې
قېمتي ځان څومره ارزان وژنې

د کاينات غوره مخلوق دى انسان
خالق خفه شي چې انسان وژنې

ظلم قتلونه کوې، شر او فساد
مسلمان نه يې، مسلمان وژنې

اقتدار غواړې د دهشت په توره
څو به په دا توره جهان وژنې

دا څه پښتو دا څه غېرت خو نه دى
مار د لستوڼي يې افغان وژنې

نه يې د لاس نه يې د پښو څه ګناه
بې ګناه ښځې ماشومان وژنې

څوک به بيمار څوک به روزګار پسې ځى
بې وسه، بې کسه خواران وژنې