د لوی، مهربان او بخښونکي خدای په نامه

د سولې نوې کړکۍ؛ طالبانو ته د طيب آغا پر ځای مشوره

خوشحال آصفي 23.10.2016 02:33

په داسې حال کې ويل کيږي له اسلامي حزب سره د افغان حکومت د سولې تړون له لاسليک وروسته وسله والو طالبانو هم له افغان حکومت سره پټې خبرې پيل کړي دي؛ اوس په تازه کې په قطر کې د طالبانو د سياسي دفتر پخواني مشر طيب آغا وسله والو طالبان وته د سولې نوې نسخه وړاندې کړې ده. سید طیب اغا په یوه لیک کې ویلي چې طالبان مشران دې له پاکستانه ووځي، بهرني جنګيالي دې له خپلو ليکو وشړي، د اميرالمومنين او امارت نومونه دې لغوه شي، په مسجدونو کې دې چاودنې بندې او د قطر دفتر ته دې واک ورکړل شي چې جامع تګلاره جوړه کړي. نوموړي له ملا هبت غوښتي هغه کسان له خپلو لیکو وباسي چې د پاکستان، ایران او نورو هیوادونو له استخباراتو سره مستقیم یا غیرمستقیم اړیکي لري.  

طیب اغا همداراز وړاندیز کوي« د سیاسي او خارجي امورو لپاره دې یوازې سیاسي دفتر وي. هغه نظامي او غیرنظامي مسوولین یا افراد چې د پاکستاني، ایراني او نورو خارجي استخباراتو سره مستقیم یا غیر مستقیم اړیکي ساتي د یو یا دوه خبرداریو څخه وروسته د یو څه وخت لپاره او یا د نه اصلاح په صورت کې د ټول وخت لپاره د کاره ګوښه کړل سي.» ویل کېږي چې طیب اغا د پاکستان د فشار له کبله د ملا اختر محمد منصور له لوري د قطر د دفتر له مشرۍ لېري شوی و.

له دې سره هم مهاله پاکستان هم د افغان سولې ډول ته ډنګ ورکړی دی. پاکستان چې وليدل چې افغان حکومت وسله والو طالبانو سره له پاکستاني چينل پرته د سولې خبرې شروع کړي دي نو د دې لپاره چې نړۍ ته وښايې په دغه پروسه کې پاکستان هم مرسته کوي یا د پاکستان مداخله هم په کې شتون لري نو په بهرنیو چارو کې د پاکستان د لومړي وزیر نواز شریف سلاکار سرتاج عزیز هم د افغان سولې اړند نوې څرګندونې کړي دي. نوموړي په افغان جګړه کې له ښکېلو خواوو د سولې د خبرو اترو غوښتنه کړې او په ډاګه کړې يې ده، چې افغان طالبان د سولې خبرو اترو ته لیواله دي. د هغه په وینا، د سولې خبرو لپاره د طالبانو دراضي کولو په موخه پاکستان چې څه کولی شول، هغه یې کړي او داسې اشارې شته، چې طالبان هم د سولې خبرو اترو سره لیوالتیا لري. سرتاج عزيز دا څرګندونې په اسلام اباد کې په هغه غونډه کې کړي چي د افغانستان او پاکستان وکیلانو، پخوانیو دولتي چارواکو، د سولې استازو او د مدني ټولنې غړو برخه اخیسته وه.

پر طالبانو د طيب آغا د څرګندونو اغيز

طيب آغا په قطر کې د طالبانو د سياسي دفتر پخوانی مشر او په دغه ډله پراخ نفوذ لرونکی دی. د نوموړي وروستۍ څرګندونې طالبان ته د هغه ذهنيت په ورکولو کې مهم واقع کیدای شي چې افغان حکومت او ولس يې په بار بار تکراروي. د طیب آغا له لوري د طالبانو مشر ته په ليک کې وړانديز کول چې له خپلو ليکو دې بهرني جنګيالي وباسي؛ دا به هغه طالبان چې د خپلو مشرانو په اصليت نه و خبر؛ دا روحيه او باور ورکړي چې د دوی مشران د پاکستان، ايران، روسيې او نورو هيوادونو تر اغيز لاندې دي او د هغوی په امر جنګيږي. هغه طالبان چې د مذهبي ايډيالوژۍ له مخې جنګيږي؛ پوه به شي چې جنګ يې یوازې د پردیو د ګټو لپاره دی او قرباني يې دوی ورکوي. دوی به د خپلو مشرانو په اصليت پوه شي چې آی ايس آی، سپاه پاسداران او د کی جي بي په اشاره د هغوی لپاره جنګيږي او د جهاد په نوم افغان وژنه ترسره کوي. فلهذا يا به افغان حکومت سره یو ځای شي او يا به کم تر کمه د وسله والو له ليکو جدا شي.

پر افغان سوله د طيب آغا د څرګندونو اغيز

لکه څرنګه چې طيب آغا په قطر کې د طالبانو د سياسي دفتر پخوانی مشر دی نو په وسله والو طالبانو د پراخ نفوذ درلودو تر څنګ د طالبانو د ليکو او تشکيلاتو څخه هم خبردار دی. دی په طالبانو کې د سولې غوښتونکي او د جنګ غوښتونکي طالبان هم پيژني، همداراز د طالبانو په ډله کې هغه مشران هم پيژني چې د پاکستان، ايران او روسيې تر اغيز لاندي دي او د هغوی په اشاره جنګيږي. نو دا افغان حکومت او د سولې عالي شورا لپاره ښه ادرس دی چې له طيب آغا او د دې له معلوماتو څخه په استفادې له وسله والو طالبانو سره د سولې د مخامخ خبرو ادرس پيدا او د بشپړ بین افغاني پروسې له مخې د سولې پروسه مخته يوسي. افغان حکومت ته په کار ده چې د طیب آغا په نسخې غور وکړي او د سولې په پروسه کې ترې ګټه واخلي.