جنرال علی شاه پکتیاوال غواړي فاینانشال ټایمز محکمې ته راکاږي

د پژواک خبري اژانس وايي چې د کابل د پولیسو د جنایي څېړنو مشر جنرال علی شاه پکتیاوال ورته ویلي دي چې نوموړی غواړي فاینانشال ټایمز نړیوالې محکمې ته راکاږي.

جنرال پکتیاوال وایي چې فاینانشال ټایمز د نوموړي د املاکو په اړه ناسم معلومات خپاره کړي دي.

څه موده مخکې له لندن څخه خپرېدونکې ورځپاڼې فاینانشل ټایمز ویلي و چې داسې اسناد لري چې د علي شاه پکتیاوال لاسلیک پرې شته او په دوبۍ کې د نوموړي املاک ښايي. فاینانشال ټایمز ویلي و چې دغه سند ښایي چې د دوه ملیونو امریکایي ډالر په ارزښت پکتیاوال په دوبۍ کې څلور کورونه، یو اپارتمان، درې فارمونه، اته سوداګریز املاک، او دوه فابرېکې لري.

ټول افغان ټکی کام په دې اړه څېړنه کړې وه او دې نتیجې ته رسیدلی و چې په دوبۍ کې په دوه ملیونه امریکايي ډالرو دومره املاک نه رانیول کېږي لکه څومره چې فاینانشال ټایمز وایي او ښکاري چې د فاینانشال ټایمز سند جعلي دی.

د ټول افغان څېړنیز رپوټ چې د فاینانشال ټایمز د سند جعلیتوب ثابتوي، دلته ولولئ

فاینانشال ټایمز دا نه و ویلي چې دا سند یې له کومه لاس ته راوړی دی، خو په بېنوا ټکي کام کې د فاینانشال ټایمز د لیکنې په خپره شوې ژباړه کې ژباړن ویلي و چې نوموړی سند د علي شاه پکتیاوال (( د دفتر د ميز له جابي څخه)) غلا شوی و.

فاینانشال ټایمز ویلي و چې پکتیاوال ورته له دې املاکو له لرلو څخه انکار کړی او ورته یې ویلي و چې د نوموړي د املاکو په اړه سند جعلي دی.

علي شاه پکتیاوال څه موده مخکې د طالبانو په یو برید کې سخت ټپي شوی و چې بیا وروسته د ټپونو د درمل دپاره هندوستان ته تللی و. پکتیاوال اوس هېواد ته راستون شوی، په پوره توګه روغ شوی نه دی او لا اوس هم د درملنې لاندې دی.

علي شاه پکتیاوال دا نه دي ویلي چې هغه افغاني رسنۍ چې په ده یې ورته تورونه لګولي و هم محاکمه کړي او که څنګه.

 په دې اړه نورې لیکنې او معلومات:

دعليشاه پکتياوال په اړه دبرتانوي ورځپاڼې اسناد جعلي ښکاري
څوک په وحشتناک فساد کې؟ علي شاه پکتیاوال که د بېنوا لیکوال!
د ښاغلي مجبور ژباړه او د ښاغلي مومند د ویاړ ځواب
ولې پر خپله سپينه جامه تور داغ لګوئ؟
عليشاه پکتياوال يو ډاکو که اتل پولیس افسر؟