ښکلې پرخه چې تر ما رسي په تله شي
لکه شِعَر چې په ژباړه کې اوبه شي

د ماشوم په څېر مې زړه ته را نږدې شي
ستا له درده جوړ غزل زما پر خوله شي

د پښتون دا بدمرغي نه ده، نو څه دي ؟
چې پر کور يې له هر لوري کوز غوايه شي

د پردو لپاره درست عمر جګړه کړي
د خپل حق په اخستلو کې ويده شي

زه د ځان قاتل پخپله ځان پسې يم
خداى ناترسه که له خدايه مې ډار وشي

خلک د مړو درناوى کوي ((سهاره))!
زموږ له لاسه يې مزار هم کنډواله شي(١)

------------------
(١)- د حضرت عبدالرحمان بابا مزار ته نغوته شوې ده.