د کمال سادات په اړه خپرې شوې ليکنې ، پخپله ډاکټر صېب او يو شمېر  نور ملګري خوابدي کړي دي.  په دې ليکنه کې زما موخه د سادات د وړتياوو ننګول نه وو، ځکه ډېر هغه څه، چې موږ يې ديوه خبريال ځانګړنې بولو، دسادات  په شخصيت کې ترسترګو کيږي او بيا د بي بي سي په څېر له يوې نړيوالې شبکې سره کار کول په ولس کې د هغه اتبار او حيثيت خامخا خوندي ساتي. په کره کتنه کې د يوچا نيمګړتياوو ته ګوته نيول کيږي، خو دا ګوتنيوى په هيڅ توګه د چا د سپکاوي په مانا نه وي. دغه ليکنه، چې د ځينو ملګرو په وينا، د کره کتنې ارونه نه دي پکې مراعات شوي، د سادات د سپکاوي په موخه نه ده شوې، بلکې يو لړ ستونزو ته د هغه د پام اړونې په خاطر شوې ده. سادات د يوه ډاکټر او خبريال په توګه زه نمانځم او د برياوو په تمه يې يم. که چېرې ملګري پر دغسې نيوکو خوابدي کيږي، ((سهار ))به کله هم نور پر دغسې نازک زړيو دوستانو د قلم پورته کولو جرئت ونه کړي.

په درنښت

نذيراحمد سهار