هيلي مي له درد سره پخلا شوې په يوه ، يوه

اوښكې مې له  سترګو  راجلا شوې  په  يوه ، يوه

ماچې به ستا نوم پرې اخيستى هاغه د خيال تسپې

پرې شوې بې طالبه بې ملا شوې  په يوه ، يوه

هاغه پخوانۍ تورې او زغرې زمونږ د پلار نيكه

چېرې دي ؟  چا يووړې ؟  ټولې غلا شوې  په يوه ، يوه

څومره پښتنې  په  پردي  جنګ  كې كونډې  بورې  شوې

مينزې  شوې  بې ستره  بې كلا  شوې  په  يوه ، يوه

بخته ! زمونږ د امن ښايسته او تاريخي سيمې

څنګه د سرو وينو كربلا شوې  په  يوه ، يوه