دا كلى مه ورانوئ.
دا كلى مه ورانوئ
ګورئ چې هلته د شنو ولو د شنو سيورو لاندې
ګورئ د شنې ويالې تر څنګه د جلګې د پاسه
يو كوچنى پروت دى
يو كوچنى ويده دى
او تر تر وړې لوپټې لاندې
په خوب وړو سترګو
د ناز په غېږه كې كوچني شينكي خوبونه ويني
دا كلى مه ورانوئ
دا كلى مه ورانوئ
ګورئ چې هلته لكه زركې زمونږ د كلې نجونې
ګورئ چې د هلته د بامو پر سر نورسې نجونې
قطار قطار د لمر تر وړانګو خپل پېكي جوړوي
او په مينو ژبو
د پېغلتوب غوږ كې د ځوان هوس سندرې بولي
دا كلى مه ورانوئ
دا كلى مه ورانوئ
ګورئ چې هلته د هغو سپېرو كوډلو لاندې
ګورئ چې هلته د دې تورې تروږمۍ له غېږې
ساړه زګېروي جګېږي
سوزمن اواز راځي
او امېد وارې مېندې
د انتظار د بن د سرو ګلونو لارې ځاري
دا كلى مه ورانوئ
دا كلى مه ورانوئ
له مــــيـــنـــې مجلې څخه په مننه 
