افضل شوق دَ ایډیال او معشوق لټون کوي
ښاغلی افضل دَ ادب دَ لیلا مئین دی او دَ مینې په دښته کې یې دَ شوق کیږدۍ جوړه کړي ده - پر دې دښته دَ ښکلا قافلې ځي او راځي او شوق دَ ښکلا کرشمې ترې راټولوي - کله کله خو دَ شعر دَ پرۍ دَ غاړې امېل ترې دانه وانه کېږي او شوق په ډېر شوق دَ شلېدلي امېل دانه دانه ملغلرې راټولوي - دَ ادب دا لېونی او لالهانده مجنون دَ شوق دَ پریانو خولۍ پر سر ږدي او دَ ښکلا اووه ګامه مزل کوي –
اوس نودا دی ّ په لټون ستا دَ څېرې ّ راوتلی دی - دا سفر یې بس ولوله لکه ابراهیمي عشق - ستا څېره به کله دَ ستوري په رَپه رَپ کې کي او کله به دَ تمامې سپوږمۍ پسته مسته رڼا کې ګوري - خو کله چې لمر دَ شپې پر دُرشل دَ شوخو وړانګو یرغل وکړي، بیا به نو نه دَ ستوري رَپ ویني او نه دَ سپوږمۍ پړک - هغه دی چې لمر ته به دَ سوال ځولۍ غوړَوي او ستا دَ څېرې تصویر به ترې غواړي –
په دې لنډه کتنه کې، زه پر دې نه ګډېږم چې ّپه لټون ستا دَ څېرې ّ شعرونه څنګه دي - هسې ماته دا لټون ډېر ښکلی ښکاري - افضل دَ خپل ایډیال او معشوق لټون کوي - دا ډېر ښکلی ارمان دی - شوق چې په څه کې دا ښکلی معشوق لټوي ، هغه شیان هم ښکلي دي – افضل شوق بختور دی ، چې یوه ښکلا په بله ښکلا کې لټوي - دَ مور شُودې دي یې شي - او ډېر ډېر یې مبارک شه دا لټون ، ّ په لټون ستا دَ څېرې ّ –
په ډېره مینه او ادب
پیر محمد کاروان
افغانستان - کابل - خېر خانه مېنه
۲۰۰۲ - ۱۰ - ۲۸
