ګوندې وي چې مې تر پايه پورې مله شې
نه د روح په څير چې څو شپې راسره شې
له اعمالو دې شيطان هم پناه غواړي
د راستۍ ميدان چې راشي پرښته شې
له تا پرته مې ژوندون راپورې پېټی
ته زما له ژونده وخورې مړه خو مه شې
له قيامت وروسته مې هم په زړه کې اوسه
نه چې ژوند غوندې مې څو ورځې  ميلمه شې
زه به هم زرې زرې حواس راټول کړم
ته به هم تر هغې خپل ځان  ته ستنه شې
اوس مې زړه درته په سرو وينوخړوب دی
اوس دې خدای نه که چې بل زړه کې راشنه  شې
د خپل زړه د انتخاب باور مې زيات شي
ته چې څومره زيات پخپل حسن غره شې.