د شپې له زوره چې د لمر د سکون ساه وتې ده
په خوب ويده دی او که نه، له پښتون ساه وتې ده
مونږه پيريان د سليمان (ع) نه يو چې نه پوهيږو
مونږ ښه خبر يو چې پاچانه پرون ساه وتې ده
څه جنتونو کې روان يم، دا څه حورې غلمان
شکر په خوب کې مې دچا په زنګون ساه وتې ده
شپېلۍ يې ماته او رمه يې تر اوو غرو آوښتې
خدای خبر څنګه پورې غره کې له شپون ساه وتې ده
پاچا په غم د ولس نه دی، ولس هم دغسې

له دې ولسه د پاچا په ګډون ساه وتې ده
چې زه جنت ته نه ځم، څوک به تر ما مخکې ورشي!
خدايه! دنيا کې رانه ستا په لټون ساه وتې ده
ستوری چې پريوزي، تنهايي شي د ليلا راياده
وايم چې نور نو په رښتيا له مجنون ساه وتې ده
ژوند يې هم خپل و او د مرګ پورهم د چا نه و پرې
ملګرو څنګه له حيران په ژوندون ساه وتې ده.

ګوربت تلويزون، کابل – ۱۹ جولايي ۲۰۰۱۱ م کال