ژبه دې د مينې ده خبره دې د مينې ده
يوه دنيا په سترګو کې دلبره دې د مينې ده
دا سوې نارې مې د احساس په تسلۍ واخله
هره يوه اوښکه مساپره دې د مينې ده
ماته اسويلي د نهيلۍ دې غيږ کې نه راځي
ورځ لکه اختر شپه بختوره دې د مينې ده
هيرې کړه زړګې د ګل د مينې کيسې هيرې کړه
دا سپيره مماڼه د  زړه سره دې د مينی ده
وکره پرې هيلې نن د مينې د سبا په نوم
خاوره د ميينو لر او  بره دې د مينې ده
بيا ئ د ورک امن په خاطر ګرانې راغبرګه کړه
ژوند په کې څپې وهي سندره دې د مينې ده

٢٠٠٧,٩,٢٠
مصطفی امن
ناروی _اوسلو