د برتانيې په ملي موزيم (هلمند) کې د روان او د تېرو دريو کلونو د جګړو نندارتون پرانستل شو. نندارتون د جګړو هغه برخه انځور کړې، چې پکې برتانوي عسکرو ته د طالبانو په لاس ماتې ورکولو او ورته د ځاني او مالي زيانونو وراړولو صحنې ښيي. فوځيان ژاړي او له طالبانوسره سخت مقاومت کوي؛ خو هلته خلک د طالب نوم نه اخلي؛ بلکې د (افغان) کلمه تکراروي. پورتنۍ خبرې الجزيرې خبري عربي تلويزيون ميدان ته راوکښله، چې ډېر اوږد او په زړه پورې راپور يې پرې برابرکړی و. عرب خبريال، چې د افغانستان تاريخي سوبې يې په ډېر وياړ يادولې، له هغو يو څو فوځيانو سره لنډې مرکې وکړې، کوم چې د افغانستان د هلمند ولايت څخه راستانه شوي وو. فوځيانو د افغانانو له سخت مقاومت څخه سخت شکايت کاوه، ځينو خو د هغو شېبو په رايادولو له سترګو اوښکې هم وڅڅولې. د موزيم مشرانو وويل، چې زموږ موخه ددې نندارتون څخه خپل ولس ته دا ورپه ډاګه کول دي، چې موږ له دومره سختيو سره هم ستاسو له حقونو څخه دفاع کوو؛ خو خبريال چې د نوموړي پر خبرو تبصره کوله، زياته کړه:
دوی خو خپل ولس ته د دفاع خبره کوي؛ خو بل پلو نړيوالو ته دا په زبات رسوي، چې افغانان د جګړو او جنګي مقاومت کلکه تجربه لري او افغانان د برتانويانو په حق کې يو ځل بيا خپل زوړ تاريخ تازه کوي.
له الجزيرې تلويزيون څخه.