يو نوی غزل:


د لر او بر د پيوستون د پاره يې جنګ کړی دی
دا زلمی څوک دی دايې څه په نره ننګ کړی دی

ښکلي د زړونو سوداګر دي زړونه پلوري پېري
زمونږ نو کله اخلي! زموږ زړونو خو زنګ کړی دی

څه د حالاتو ژرندې دل کړل، څه ځوانۍ وخوړل
دې ګلابونو خو له خپل ښايسته رنګ کړی دی

هغه ده توره يې په سرو وينو رنګينه راوړه 
دې د خوشال بچي ګذار بيا په اورنګ کړی دی

هغه چې سختو مرحلو کې مو هم زړونه پالل
هغه ناځوان رانه په نه خبره څنګ کړی دی

واکه زړګی وو لکه غر، لکه هندارې په شان
اوس د چا غم مات کړی پروت دی اوس يې شرنګ کړی دی