غزل

که زه تياره وم د خپل ځان په دايره کې به يم

که رڼايي شوم د جهان په دايره کې به يم

 

وخته بلا دې واخلم نور مې زندګۍ ته پرېده

يو خوار پښتون يم د دوران په دايره کې به يم

 

يو څوک دي زما لپاره لاس پورته کوي دعا ته

همېش د دغه لوی احسان په دايره کې به يم

 

که ستا د مينې دغه لوړ مقام ته ورسېدم

سم لکه ستوری د اسمان په دايره کې به يم

 

زما وژلو ته د چا په فتوا راغلې ځوانه

د خدای بنده يم د ايمان په دايره کې به يم

 

کله که راغلې نو ګلونه به دې لار کې شيندم

که رانه لاړې د ارمان په دايره کې به يم

 

که چېرته ښه شوم پرښتې به مې سلام ته راځي

که چېرته بد شوم د شيطان په دايره کې به يم

 

واک مې درکړی چې هر څه غواړې هغه به کوم

دا ستا د حسن لامکان په د ايره کې به يم

واک