فی البدیهه مشاعره

مطلع دوران داسي جوړه کړه

دامشکل به شي اسانه خدای به خیر کړي :::: لا خو نه یو بې جانانه خدای به خیر کړي

 

جلال :

لا خو شته څه انسانیت په سر د مځکي

چي را ټیټ نه شې اسمانه خدای به خیر کړي 

 

نعیم افغان

 :یارانه کي دبنګړوماتول تل وي 

 ته پرڅه یې پرېشانه؟ خدای به خیرکړي

 

دوران:

 دحالاتو زور په  زړه کي لرو شکر

پاتي نه یو له کاروانه خدای به خیر کړي

 

 ګوهر:

رسوایي او مینتوب سره تړلي

ګوره ته نه شې پښېمانه خدای به خیر کړي

 

دوران:

مستقبل زما او ستا دی لېونیه

رقیب خلاص دی له ایمانه خدای به خیر کړي

 

نعیم افغان  

:یوه ورځ به دي پرسپین مړوندویدېږم

خیرکه اوس یم بې لتانه ،خدای به خیرکړي

 

جلال :

د ژوندون لوړي ژوري دي (الهامه)

زړه به نه بایلې قربانه خدای به خیر کړي　      (دا شعر نصرت الهام ته ډالۍ شوی)

 

ګوهر:

بس د تا په دې خبره مي زړه تم دی

خفه نه شې په ما ګرانه،خدای به خیر کړي　

 

نعیم افغان:

 که دي وصل دژوندون په بیه پلورې

داخوډېره د اسانه ،خدای به خیرکړي 

 

حمید احساس

دا ته ولې؟ له ما لرې لرې ګرځې

 دومره نه یم بې وجدانه، خداي به خیر کړی 

 

ګوهر:

 اینده به دي روښانه لکه لمروي

زړه چي ونه خورې افغانه خدای به خیر کړي　

 

حمیداحساس:

ټول یاران مې راټول کړې دی یو ځاي ته 

 رستم نه شته دی ناځوانه، خداي به خیر کړی 

 

ګوهر:

اې ریباره یوځل بیا په جرګه ورشه

لا خبره نه ده ورانه ،خدای به خیر کړي 

 

نعیم افغان:

په زړګي کي دي دکوم ښکلي تصویردی

راته ووایه ارمانه ،خدای به خیرکړي

 

جلال :

 هغه کاڼې زړه به هم الله اوبه کړي

بس دې مه ژاړه ارمانه خدای به خیر کړی

 

نعیم افغان:

دمین دسترګواوښکي دي غمي دي

ورته لپه کړه ګرېبانه ،خدای به خیرکړي

 

ګوهر:

د امید ډېوې راواخلئ ځو به وړاندي

دا تیارې به شي روښانه خدای به خیر کړي

 

جلال :

 په ښارونو کي هم زور د زولنوشو

اې د تورو غرونو ځوانه خدای به خیر کړي

 

جلال :

رنګ دي زېړ مه شه د خلکو له پېغوره

اې زما د زړه سلطانه خدای به خیر کړي

جلال :

اې د هري وار خطا بلا دي زه یم

لکه ګل اوسې خندانه ،خدای به خیر کړي

 

ګوهر:

هغه کیږي چي وي خدای درته لیکلی

ته یې ولي سرګردانه خدای به خیر کړي

 

جلال :

زړه چاودون مي رانزدې دی پسرلی دی

بس خلاصیږو له طوفانه خدای به خیر کړي　

 

نعیم افغان:

که رمه کي دي په ډلولېوان ګرځي

بس همت وکړه څاروانه !خدای به خیرکړي

 

جلال:

ما دزړ ه د پرهرونو ورته ووې

راته یې ووې زما زماځانه خدای به خیر کړي 

 

ګوهر:

زما زړه ته د اشنا غمونو ووې

اې زمونږ خوږه مېزبانه ،خدای به خیر کړي

 

جلال:

ښه ډبله لوپټه به درته راوړم

زړه دي مه خوره له بارانه خدای به خیر کړي

 

جلال :

 د کابل خلک مي نه شې تېر ایستلی

یم راغلی له لغمانه خدای به خیر کړي

 

دوران:

د دوران ،دوران به بیا راشي که خیر وي

سره ګورو به طوفانه خدای به خیر کړي 

 

ګوهر:

 د (بهیر) ضرورتونه به پوره شي

ته غم مه کوه (دورانه) خدای به خیر کړي