کومي سترګي چي مي زړه په يو نظر وړي         هغه سترګي رانه غوښي د زيګر وړې 

عاشقي په تمامي دنيا کي دود دې                       غماز راشي رانه مينه د دلبر وړې

زه په مينه کي د سرو مال نه تير يم                         پدي خوښ يم چي په مينه کي مي سر وړې

دا به خوب که تصور که حقيقت وي                       چي اغيار رانه په بډه زور او زر وړي

خوب کي وينم چي ياجوج ماجوج لګيا دي          په تيرو نوکو کي سر سکندر وړي

رقيب راشي په مکاره خوله مي ورورکړي           په ورورۍ کي مي د لاسه نه خنجر وړي

سومنات د غزنوي په لاس نسکور شي                  سره طلا تري بيا بلا د سمندر وړي

طوفاني سيلۍ راوالوزي جهان کي                       انسانانو سره يو ځاي سمه او غر وړي

ګيدړان کلي کي ډلي ډلي ګرځي                           د بامونو نه چرګوړي مازيګر وړي

ددي خوب تعبير له کوم ملا له ورشم                     ملا خپله جنازه د پيغمبر وړي

يا به تندر يا ګلي يا به جاکړوي                 توره وريځه چي د شنه اسمانه لمر وړي

تندري ګلي چه اوري په کونړ کي                           سيلابونه به ئي خپله پيښور وړي

حيدري د ظلم زور په دي دنيا کي             د کمزورو غوښي خوله کي زورور وړي

عبد القدوس حيدري