غزل

نن مې بعد له وخته د یو چا تصویر ته وژړل
څنګه مې په چیغو چیغو ستا تصویر ته وژړل
ما خو به اکثره پری زخمي زړګی ټکور کړلو
خدای خبر چې دا مې ولې بیا تصویر ته وژړل
ما به وې چې نوره یی نامه په ژبه نه اخلم
هسې مې نن بیا د بی وفا تصویر ته وژړل
هله مې زړه سپک شو هله زه بی غمه څملاستم
ما چې بیګا ځانته د اشنا تصویر ته وژړل
راشه په خندا کې مې د زړه ژړا ته غوږ شه لږ
پټ مې په محفل کې په خندا تصویر ته وژړل 
زه چې ځان ته ځیر شومه حیران دیوال ته کیناستم
ما سلیم په خپله بیا زما تصویر ته وژړل

                  سلیم احمدزئ