یادونه:
لاندې غزل زما د یو ملګري لخوا چې یار یې مستعار نوم دی را لیږل شوی دی هیله ده په لوستلو یې خوښ شی او خپلې تبصرې پرې ولیکی.
د زړګي درد مې خير دی زيات اوسه
خو ، ګوره ياد دې دا لمحات اوسه
د غره لمن وي په کرکڼو ښايسته
د چا باڼه مې په زړه مات اوسه
ما د يقين په پړي و نه تړې
تلوسه ښه ده ، امکانات اوسه
سترګې دې مړې شي ، ګل شي ، تل دې داسې
هېرې وعدې د ملاقات اوسه
ستا کليسا اوسه چينه د ښيښو
زما په امن کې جومات اوسه
مينې ! ژوندی دې کړم ، ژوندۍ خو دې وې
ورځ دې اختر ، شپه دې برات اوسه
زه پېښور غوندې پرهر خير دی
خو ته اباد لکه هرات اوسه
sandareezyaar@yahoo.com
