غزل
هر یو ستم مو په دې زړه د اســــــــــمان پټ ساتلی
د وخت له سترګو مو همیش دی جانان پټ ساتلی
مونږه په پـــــــــــــــټو سترګو هم له ژونده اخلو مزه
مونږه د زړه دننه هم یو جهان پـــــــــــــــــــټ ساتلی
تا لونګین دی راخور کړی په ســــــــــــــینه دپاسه
تا د پلو لاندې د مشـــــــــــــکو دا کان پټ ساتلی
د غونډې زنې په دې چاه کې دې شین خال دی اوده
که په زندان کې دې یوسف د کنان پــــــټ ساتلی
مونږ خو په مینه کې د زړه او سر حساب نه ساتو
مونږ جوارګرو همیشه خپل تاوان پــــــټ ساتلی
څومره مو ځان را لاندې کړی دی د پښو د لاندې
څومره مو ځان ددې سپین سترګي دوران پټ ساتلی
حال مو هیچا ته ددې زړه خانه خـــــــراب و نه وی
لکه د خوږ ګوتې مو هر یو ارمــــــــــان پټ ساتلی
د مار خوړلي خو د پړي نه هـــــــــــــــــــم کیږي وېره
له ځانه هم مو ستا د وصــــــــــل امکان پټ ساتلی
ورځ یې د میاشتو په حساب،مېاشت د کالونو په شمار
تا د وصال په شــــــــا یو داسې هجران پټ ساتلی
وصال مومند کراچۍ
