د اسراييلو پولې سره پراخو مظاهرو کې څلور فلسطینیان وژل شوي

غزه کې روغتياپالان وايي له اسراييلو سره پوله کې د اونيزې مظاهرې د لومړي تلين په احتجاج کې څلور فلسطينيان وژل شوي دي. د 'اورپکې ډلې' حماس لخوا جوړو شويو دغو مظاهرو کې لسگونه زره خلکو گډون کړى و. د مظاهرې پرمهال د پولې اسراييلي اړخ کې پر عسکرو ډبرې او پطرولي بمونه وغورځول شول.

ایا پر "فېسبوک لایو" محدودیتونه لګول کېږي؟

نیوزیلنډ کې پر دوو جوماتونو له برید نژدې دوې اونۍ وروسته د خواله رسنۍ فېسبوک چارواکي وايي، په ژوندۍ بڼه د ویډیويي تصویرونو پر خپرولو د محدویتونو پر ډېرولو غور کوي. د فېسبوک عملیاتي مشره شیرل سینډبرګ وايي، فېسبوک مني چې باید نور اقدامات وشي.

جنرال عبدالرشید دوستم له وسله وال بریده روغ وتلی

د افغان ولسمشر محمد اشرف غني لومړی مرستیال جنرال عبدالرشید دوستم نژدې دوه نیمه کاله وروسته هېواد ته ستون شوی او د رپوټونو له مخې د نوموړي پر لېږدونکي کاروان د شبرغان مزار لارې اوږدو کې د تیمورک سیمه کې برید شوی دی.

طالبانو د بدخشان ارغنج خوا ولسوالي ونیوله

بدخشان کې چارواکي وايي چې د دې ولایت ارغنج خوا ولسوالي طالبانو ولکه کړې ده. د دې ولایت د پولیسو ویاند ثناءالله روحاني د بي بي سي ځايي خبریال قربان علي همزي ته منلې چې طالبانو دغه ولسوالي نیولې او د ولسوالۍ د ودانۍ شاوخوا جګړه روانه ده.

هرات، فاریاب او بلخ کې سېلابونو ۲۰ کسان وژلي

د افغانستان په شمال او لویدیځ کې چارواکي وایي، سختو سېلابونو په دې سیمو کې لږ تر لږه شل کسان وژلي دي او ۱۴ نور ټپیان دي. د چارواکو په وینا، په فاریاب کې ۱۰، په هرات ولایت کې ۹ او په بلخ کې هم یو تن د دې سېلابونو له کبله وژل شوی.

''هندي هوايي شرکتونو افغانستان ته الوتنې ځنډولې''

د افغانستان ملکي هوايي چلند ادارې مسوولین وايي، د هند پلازمېنې ډیلي ته د پاکستان له لارې د الوتنو اجازې نه موندلو له کبله ټولو هندي هوايي شرکتونو افغانستان ته خپلې الوتنې درولې دي. چارواکي وايي، د هند او افغانستان ترمنځ هوایي تګ راتګ لپاره د پاکستان هوايي حریم تړل کېدو له کبله افغانستان ته نژدې اته میلیونه ډالره زیان رسېدلی دی.

روسیه د وینزویلا په هکله د ټرمپ خبرې "بې نزاکتي" بولي

مسکو د امریکا د ولسمشر ډونلډ ټرمپ دا خبرې "بې نزاکتي" بولي چې ویلي یې دي روسه باید له "وینزویلا ووځي". وینزویلا ته د روسیې د پوځ د لېږلو په تړاو له خبرونو وروسته ډونلډ ټرمپ دا خبره وکړه.

غزني کې څلوېښت کاله وروسته موزیم پرانیستل کېږي

افغان چارواکي وايي، غزني موزیم، چې په افغانستان کې له بډایه موزیمونو یو دی له ۴۰ کلونو وروسته بیا پرانیستل کېږي. د غزني کلتوري ادارې چارواکو په خبره د غزني موزیم اثار له تاریخي اړخه په بودايي او اسلامي دورو پورې تړاو لري.

زلمی خلیلزاد: له افغانستانه د امریکايي ځواکونو وتل د کلونو خبره ده

د افغان سولې لپاره د امریکا بهرنیو چارو وزارت ځانګړی استازی زلمی خلیلزاد وايي، که څه هم تر اوسه داسې کومه هوکړه نه شته، خو له افغانستانه د امریکايي پوځونو وتل کلونه وخت نیسي. نوموړي له طالبانو سره له وروستیو خبرو وروسته لومړی ځل دغه څرګندونې له بي بي سي سره خبرو کې کړې.

کابل؛ له ۹ کلونو وروسته بیا حکومتي ادارو پنجشنبه کار پیل کړ

وروسته له نهو کلونو نن پنجشنبه په لومړي ځل د کابل د ملکي ادارو ماموران خپلو دندو ته ځي. د ۱۳۸۹ کال په وروستیو کې افغان حکومت وپتېیله چې د کابل ملکي ادارو کارکوونکي پر پنجشنبو رخصت او کاري ورځې یې له شپږو پنځو ته را کمې کړي.

د نازیه اقبال ورور په اعدام محکوم شو

پاکستان کې یوې محکمې د مشهورې سندرغاړې نازیه اقبال سکه ورور افتخار علي د نوموړې پر کوچنیو لوڼو د جنسي تېري په تور د مرګ سزا ورکړې. د راولپنډۍ محکمې قاضي طاهر اسلم د نازیه اقبال ورور افتخار علي شپږ سوه زره روپۍ جریمه کړی هم دی.

کونړ کې د طالبانو او داعش جګړې دوه زره کورنۍ بېځایه کړې

د کونړ ځايي خلک وايي د دې ولایت چپه دره کې د طالبانو او داعش ترمنځ جګړې د دې ولسوالۍ زرګونه کورنۍ د خپلو مېنو پرېښودو ته اړ کړې دي. ځايي خلک وايي، د دواړو لورو ترمنځ دا جګړه د حمل یا وري په دویمه پیل او پرون او نن له دوو درو طالبان شاتګ ته اړ شوي.

"له طالبانو سره تراوسه پر یوه مسله هم هوکړه نه ده شوې"

په کابل کې د امریکا سفیر وایي، د قطر دوحه کې د امریکا او طالبانو ترمنځ خبرو کې پر هیڅ یوه مسله هم هوکړه نه ده شوې. د زلمي خلیلزاد په مشرۍ امریکايي پلاوی د طالبانو د قطر دفتر له استازو سره تر تېرې میشاتې د پنځم ځل لپاره ولیدل.

خلیلزاد: د عمران خان څرګندونې رغنده نه وې

د افغان سولې خبرو لپاره د امریکا متحدو ایالتونو بهرنیو چارو وزارت ځانګړی استازی زلمی خلیلزاد په افغانستان کې د لنډمهالي حکومت د جوړولو په تړاو د پاکستان لومړي وزیر عمران خان خبرې ته په اشارې سره وايي، د ښاغلي خان څرګندونې رغنده نه وې.

اروپايي ټولنه: افغان سوله کې ضمانت ته چمتو یو

اروپايي ټولنې ویلي چې د افغانستان په سوله کې ضامن کېدو ته چمتو دي. دغه وړانديز د يادې ټولنې د بهرني سیاست مشرې فېدرېکا موګريني کابل ته په یوه لنډ سفر کې د افغانستان د سولې لپاره د اروپايي ټولنې د همکارۍ په یوه پنځه ماده ييزه طرحه کې وکړ. هغې اوربند او د افغان حکومت او طالبانو تر منځ مخامخ خبرې هم په افغانستان کې د سولې لپاره حياتي وبللې.