لندن کې"ترهګریز"برید: د بریدګر په ګډون ۳ کسان وژل شوي دي

د لندن مېتروپولېتن پولیس وایي، د جمعې پر ورځ د ښار په لنډن برېج سیمه کې یو مشکوک ترهګر وروسته له هغه د پولیسو په ډزو ووژل شو چې پر عامو خلکو یې د چړې وارونه وکړل او ګڼ کسان یې ټپیان کړل. چاراکو اوس منلې ده چې په دې برید کې لږ تر لږه دوه عام خلک هم وژل شوي. د بریدګر هویت تر اوسه نه دي مالوم

ټرمپ ته د طالبانو غبرګون؛ وروسته له هوکړې به اوربند سملاسي پلی شي

طالبان د امریکایي ولسمشر ډونلډ ټرمپ بېګنیو خبرو ته په غبرګون کې وایي، د دغې ډلې او امریکا ترمنځ اوربند به د دواړو لورو تر هوکړې وروسته سمدلاسه پلی شي. ولسمشر ډونالډ ټرمپ تېره شپه په یوه ناڅاپي سفر افغانستان ته ولاړ او اعلان یې وکړ چې له طالبانو سره خبرې یې له سره پيل کړي دي.

وېسټ انډيز افغانستان ته ټېسټ لوبه کې په ۹ وېکټو ماتې ور کړه

د افغانستان کرېکټ بورډ وايي د افغانستان او ويسټ انډيز ترمنځ د ټېسټ لوبې په دريمه ورځ ويسټ انډيز په ٩ ويکټو افغان لوبډلې ته ماته ورکړې. افغانستان په لومړۍ پاڼۍ کې ۱۸۷ او په دویمه پاڼۍ کې ۱۲۰ منډې کړې وې او ويسټ انډیز په خپله لومړۍ پاڼۍ کې ۲۷۷ منډې کړې وې او په دې توګه افغان لوبډلې ۳۰ منډې هدف اېښی و چې ویسټ انډیز د یوه لوبغاړي په سوځېدلو پوره کړ.

ډونلډ ټرمپ په ناڅاپي سفر کابل ته ولاړ او بګرام کې یې ولسمشر غني سره وکتل

د امریکا ولسمشر ډونلډ ټرمپ پنجشنبه ماسخوتن ناوخته په یوه ناڅاپي او نا اعلان شوي سفر کابل ته رسېدلی. نوموړي په بګرام هوايي ډګر کې له افغان ولسمشر محمد اشرف غني سره کتلي او هلته مېشتو امریکایي پوځيانو ته یې هم وینا کړې ده. دا افغانستان ته د ولسمشر ټرمپ لومړنی سفر و

امریکایی سفیر د درې ښځو په جنسي ځورونه تورن شو

درې ښځو د اروپایي ټولنې لپاره د امریکا پر استازي ګورډن سونډلنډ د جنسي ځورونې تورونه لګولي دي. دا تورونه د پورټلنډ میاشتنۍ مجلې او "پرو پبلېکا" رسنیو خپاره کړي او هغه وخت پورې اړه لري چې دی سفیر نه و. ښاغلي سونډلنډ پر ځان لګېدلي تورونه رد کړي او سیاسي یې بللي

عراقي معترضانو د ایران کونسلګري وسوځوله

د عراق پولیس وايي، معترضانو د دغه هېواد نجف ښار کې د ایران کونسلګري وسوځوله. عراقي چارواکو له دې پېښې وروسته د کونسلګرۍ شاوخوا ګرځبندیز لګولی دی. لاریونوال د ایران حکومت هم تورنوي چې په عراق کې د شیعه حکومتونو ملاتړ کوي او همدارنګه د شیعه وسلوالو ډلو ملاتړ کوي.

کندهار پولیس وايي پر اته کلن ماشوم جنسي تېری کوونکی يې نیولی

د کندهار سیمه ییز پولیس خبر ورکوي هغه ملا امام یې نیولی، چي پر یوه ۸ کلن ماشوم یې جنسي تېری کړی او بیا یې په وهلو وژلی دی. دغه پېښه تېره ورځ د کندهار د اتمې حوزې اړوند د غازي بابا غونډۍ نومې سیمه کې یوه جومات کې شوې ده.

بشري حقونو سازمان: د لوګر مدني فعالان خوشې شوي دي

د افغانستان د ملي امنیت ریاست وایي چې هغه دوه مدني فعالان یې د بشري حقونو کمیسیون ته سپارلي چې لوګر کې یې د ماشومانو د جنسي ځورونې خبره راپورته کړې وه. دغه فعالان موسی محمودي او احسان الله حمیدي نومېږي چې له څو ورځو نادرکۍ وروسته پرون معلومه شوه چې د ملي امنیت په منګولو کې دي.

ملا برادر تهران کې ایراني چارواکو سره پر افغان سولې غږېدلی

طالبانو ویلي چې د ملا عبدالغني برادر په مشرۍ د دوی یوه پلاوي په پلازمېنه تهران کې د ایران له بهرنیو چارو وزیر سره ولیدل. په قطر کې د طالبانو د سیاسي دفتر ویاند ویلي، پلاوي یې په افغانستان کې د سولې د بهیر او په ایران کې د افغان کډوالو د ستونزو په اړه له ایراني چارواکو سره خبرې کړي.

افغان حکومت ځینو هېوادونو کې خپل سفارتونه او کونسلګرۍ تړي

د افغانستان ولسمشرۍ ماڼۍ په بهرنیو هېوادونو کې د خپلو ځینو سفارتونو او کونسلګریو د تړل کېدو خبر ورکړی، خو دا یې نه دي ویلي چې دا سفارتونه او کونسلګرۍ په کومو هېوادونو کې دي. ارګ وایي چې دا پرېکړه یې د بهرنیو چارو وزارت کې د اصلاحاتو په لړ کې کړې ده

ولسمشر غني: ولس د طالبانو تاوتریخوالي ته نه تسلیمېږي

د افغان ولسمشر محمد اشرف غني وایي، طالبان دې په دې پوه شي چې په تاوتریخوالي نشي کولای افغان ولس تسلیمېدو ته اړ باسي. ولسمشر غني زیاتوي، که تاوتریخوالی دوام وکړي نو ولس به اړ شي له طالبانو سره هم هماغه چلن وکړي چې له داعش ډلې سره یې وکړ

د البغدادي ضد عملیاتو کې ټپي شوي سپي ته مډال ورکړل شو

د امریکا ولسمشر ډونلډ ټرمپ د دې هېواد د ځانګړو ځواکونو هغه سپی چې د داعش ډلې د مشر ابوبکر البغدادي د وژلو په عملیاتو کې ټپي شوی و، په سپینه ماڼې کې په ناپلان شویو مراسمو کې لیدلی دی. په دې تړاو مراسمو کې ټرمپ د کونان په نوم سپي ته یو مډال او یو ستاینلیک هم ورکړ .

بښنې نړیوال سازمان: پر افغان هلکانو د جنسي تېريو افشا کوونکي فعالان دې خوشي شي

د بښنې نړیوال سازمان د دوشنبې پر ورځ په یوه اعلامیه کې تور لګولی دی چې د افغانستان د ملي امنیت ادارې هغه دوه کسان نیولي دي چې په لوګر کې یې پر کم عمره هلکانو د جنسي تېريو له پېښو پرده پورته کړې وه. یاد سازمان په سملاسي توګه د دې دواړو کسانو د خوشي کولو غوښتنه کړې ده

کرزی: ولسمشرغني دې د کړکېچ مخه ونیسي

د افغانستان پخوانی ولسمشر حامد کرزی وايي په هېواد کې وضعیت ورځ تر بلې د بدتر کېدو پر لور روان دی او له ولسمشرغني یې وغوښتل چې پام ور واړوي. هغه وویل د دې لپاره چې افغانستان تر دې ډېر خراب نه شي چمتو دی له حکومت سره همکاري وکړي.

چین توقیفځیو کې لاهم د اویغور مسلمانانو "مغزونه مینځي"

د چین حکومت ځینې اسناد افشا شوي، چې په توقیفځیو کې په سیستماتیک ډول د اویغور مسلمانانو او نورو بندیانو مغزونه مینځي او تر هغو یې له بنده نه خوشي کوي، چې کړنې، عقیدوي باورونه او ژبه یې بشپړ بدل کړي نه وي.

OK
This site uses cookies. By continuing to browse the site, you are agreeing to our use of cookies. Find out more