د ګلزار سپیرې منګولې راشه ډکې کړه له ګلو
د رنګونو پیمانو ته غنچې راوړه د مرسلو
زه د اوښکو په تسبو باندې ثنا د ښکلا وایم
راته فرش تږې لېمې کړه په رنګه رنګه سنبلو
د سندرو له بوخڅې نه د خوښیو خیرات غواړم
د موسکا په جام یې ویشم زه د مینې پر ښاغلو
توتکۍ ورته رابولم د بورا سهم به ورکړم
وړانګې لپه لپه ږدمه د نړۍ  په ټولو ښکلو
که نغمې د حسن راوړې نو د خیال محل به ستا وي
کروندې به شي کورونه د وړو وړو بلبلو
هر غاټول به خندنی شي هر ببری د مینې نښه
د امید رمې به څري  د ښکلاوو پر غزلو