زه به ورتلم خو تا مي واچاوو دېوال په مخ کې
خواره قسمته ! بيا دي سپک کړمه د سيال په مخ کې
په تا يې سپارم د زرينو رڼاګانو خدايه !
د هيلو مات څراغ مي ايښى د شمال په مخ کې
خبر پرې نه وم چې اغزي به په لمن کې راوړي
ګلونه هسې مي پاشل د نوي کال په مخ کې
باور مي پوخ دى دښمنان به مي پښو ته راځي
مور مي ويړ کړى وو پلو د ذولجلال په مخ کې
اوس مي له خپلو خولو هم ساتي چي ړنک مي نه کړي
دومره مهم دي کړم خالقه ! لکه خال په مخ کې
رڼا ښکاره شوه اوس به خپله تيارې کډه کوي
چا راته کېښوده له ستورو ډک رومال په مخ کې
شکر سقيمه ! چې راتېر شوو د بېلتون تر ژمي
اوس به مي هيلې حوسېږي د ويصال په مخ کې
د لېمې له يادولو سره يې كاپي كول پروا نه لري
