د ژوند هره شېبه کې له ارمان سره مېلمه يم

په توره شپه کې ګوره له جانان سره مېلمه يم

شپه ټوله د غمونو يوه روښانه شپه کړي جوړه

هر وخت نوې هنداره له خفګان سره مېلمه يم

بې صبره يوه ماشومه غوندې خپلې اوښکې توى کړم

د ستړي ژوندون خوا کې له خزان سره مېلمه يم

اغزو لاره نيولى چې په کومه لار به ځمه

جانان مي قهرجن دى له زندان سره مېلمه يم

همدلته اوښکې ــ اوښکې څيرې ــ څيرې ګرېوانونه

د ښکلو سترګو خوا کې له زنان سره مېلمه يم

سپېره سپېره کورونه تل مي زړه را سوځوينه

د ګړوبو خونو مېنځ کې له طوفان سره مېلمه يم

په زړه مي نورې نورې ولولې را پاروينه

په سيمه د نغمو کې له داستان سره مېلمه يم