ژوند .....

دَ اروپایانو په نظر کې

 

ژوند ... چې دَ زرګونو تعریفونو پرته هم که وَ سنجولی شي ، نو دا خبره به زړه وَمني ، چې ګنې  ژوند نور هیڅ نه ... بلکې  دَ ساه رښته له وجود سره دَ قائم پاته کېدو نوم دی  او بس – نو ځکه خو دَ وجودیت هره نظریه دَ ساهګانو دَ لوبې یانې ژوند شاوخوا ترځي –

 

که خبره لږ نوره مخته بوځو، نو دغه ژوند ، چې  دَ ژوندئیو شیانو  اصل محرک یادېږي خپلې بڼې نه یوازې متحرکې ساتي بلکې په هر حرکت کې ژوند ته اوږې هم ورکوي ... لکه یو انسان چې دَ زوکړې له لومړۍ چیغې بیا دَ مرګ تر ورستنۍ هټکۍ پورې له ساهګانو سره پېوستون پېدا کولو دپاره هڅوال ښکاري  او هیڅکله نه  غواړي چې په دانسته توګه دي دا لوبه سرته وَرسوي –

 

ژوندی انسان ، هله خو ژوندی وي چې حرکات او سکنات یې دَ نورو ژوندئیو انسانانو په وړاندې زړه راکښونکې حرکتي اداګانې وَلري – نو ځکه  خو دَ انسان ناسته پاسته، خبرې اترې، خوراک څیښاک، پوشاک ، هن چې سوچونه ، خیالونه، فکرونه او خوبونه لا هم  دَ هغه دَ حرکتونو دَلارې  دَ هغه دَ خمیر یاني انساني فطرت او چاپېریال په سمون  په غوره شوؤ رسوماتو، معمولاتو او اقدارو کې  درست عمر تلل کېږي لګیا وي – ګوا انسان هر کله دَ خپل ضمیر په چپه دَ ټولنیز احتساب سره مخامخ لیدل کېږي –

 

په اروپا کې که څه هم دَ نورو براعظم په شانې انسانان اوسېده کوي، خو دَ دوئ ژوند دَ نورو براعظمونو په مقابله کې په مجموعي توګه نه یوازې ځانګړۍ یادېږي بلکې داسې خبرې هم دَ دغه براعظم دَ استوګن کونکو له خوا غوږونه اوري ، چې ګنې دا خلګ له نورو انسانانو څخه په هره معنا بېل او بدل دي – لازمې خبره دا چې زما په مزغو کې به هم دَ دې مفروضې په اړه بلا سوالونو سر پورته کړی وي –

 

دَ براعظم یورپ خلګ ژوند ته په کوم او څنګه نظر ګوري او دَ هغوئ په ژوند کې کومې داسې شکرې ورپه برخه شوې دي چې دَ نورو براعظمونو خلګ بالخصوص پښتانه ورته ګوته په غاښ پاتې دي ؟ زه یو پښتون سېلاني هم دغو خبرو په دې سوچ وَبارَولم چې ولې تر هغوئ پورې ځان وَنه رسوم چې خبره خلاسه شي – نو ځکه دا عمراني مطالعه دَ ( ژوند دَ اروپایانو په نظر کې ) تر عنوان دلاندې مې دَ عمراني تحقیق دَ مروجه لوازماتو په کومک دَ هغوئ دَ ژوند سنجولو هڅه وکړه – او خدائی پاک په خپل دې نېک مثصد کې دَ ډېرو ستړیاؤ او ناواړو پېښو ګاللو ورسته بریالی هم کړم – هیله کوم چې زما دغه عمراني مطالعه به دَ لوستونکې دپاره ګټوره ثابته شي –

                                                 ...........         افضل شوق  - اسلام آباد