سوپيس ، چي لا تر اوسه هم دَ بوُباجوُف ياره وه به كله كله بيا په كلاس روم كي دَ سېلاني وَ څنګ ته كښېنستله او يا چي به يې كله مخامخ ناسته وه ، نو به يې ورته داسي په هوسي نظرونو كتلو لكه هغې چي يې جوړه دَ خوړَلو هوډه كړي وي خو بلي خواته سېلاني په ځان كي دننه دننه ځكه خوړل كېدلو، چي هغه نه غوښتلو، چي دَ وسا په ارمانونو، چي لا يې اظهار نه وْ شوى باندي خاوري واړَوي-
هغه پوهېدلو، چي وسا يې په لوري كرار كرار راستنېږي لګيا ده هرڅه هرڅه ، خو بيا يې هم يو بل ته ماته نه خوړله ګوا په خپل حسن غره وسا خود لكه چي دا غوښتلو، چي هغه دَ سېلاني په زړه باندي لكه يوازينۍ ښځه فرعونه راڼۍ هاتشيپسوت ، چگي په نره يې باچهي كوله غوندي باچهي وَكړي خو سېلاني بيا دَ جمهوري روئې له سوبه دا هڅه كوله ، چي هغوئ دواړه ځان ځانته په ميني باندي داسي زړه سوړ كړي ، لكه نوموړي فرعون مينكورا او دَ هغه راڼۍ خاميريرنيبيتي چي به په خپلو كي سره كوله هم په دې خو دَ منوېلا او ډاكټر پُو دَ بېخي زيار پرته هم په دغو دواړو كي پئيل كولو ته يو هم نه تيارېد لو او وخت داسي په تادۍ مخته روان وْ چي په خپل خپل ځاى باندي هغو دواړو ښه احساسولو لګيا وْ -
يوه ورځ مازيګرچي له سي ډي سي څخه سېلاني دَ خپل معمول په شان له ډاكټر پُو او منوېلا سره دَ فلېټ په لور روان وْ، نو وسا هم په داسي وينا كولو ورڅرمه شوله ..
" غواړم چي وينډي او فلا ويه ته نن وختي سبق وَ وايم ، ولي چي بيا به مهندسين ائيريا ته له خپلي اُردنۍ خوندكۍ ناديه سره ليد لو دپاره ځم "
نن كه څه هم هغې دَ خوښي په چپه له سېلاني سره هم په كبرجن انداز هېلو هائ كړي وْ ، خوبيا يې ځكه تر منځه بله خبره نه وه شوي چي تر شا يې سوپيس ، بُوباجُوف او بتوكا هم ځانونه را وَرسولو او خبري دَ سي ډي سي له كلاسونو بيا دَ ډاكټر وسا تر برتهـ ډې پارټۍ پوري چي په دې راتلونكي څورلسم دسمبر باندي به وه پوري څه وَرسېد لې چي وسا وئيلو ، چي . .
" زه كه پارټۍ په هاسټل كي لمانځل وَ هم غواړم ، نو نران ورته نه شي راتلى نو ځكه يې هلته په ښار كي دَ ناديه په كور كي دَ لمانځلو هـڅه كوم او په دې سوب خو مازيګر ورته روانه يم"
هغې چي څنګه دا خبره سرته وَ رسوله نو سوپيس ورته واي ..
" دا خو نو نه شوه خبره .. ولي زما او يا دَ بُوبا په فلېټ كي يې نه لمانځې ، نيږدې هم دى او بل به موږ ټول درسره كومك هم وكړو"
او دغه رنګه منوېلا او ډاكټر پُو هم ورته وئيلو، چي كه هغه وَ غواړي نو دَ هغوئ په فلېټونو كي يې لمانځلى شي خو هغې دَ لږ ډېر سوچ كولو ورسته په وړې موسكا كي وَ وئيلو ..
" دَ بُوبا او منوېلا دَ فلېټونو په باب سوچ كولى شم ، لاكن دَ ډاكټر پُو فلېټ ..."
دَ ډاكټر پُوپه فلېټ باندي چي يې يوې بلې خواته سر ښورَولو ، نو هغه په لغازي خندا كي ورته وَ وئيلو . .
" " هو، هغه ستا دَ سټېنډرډ نه دى ، دا وئيل غواړې ؟
" يَه داسي خبره نه ده مسټر پُو ، هلته "
" ښه ښه ، نو ستا مطلب دا دى ، چي هلته دَ يو بل چا له سوبه ستا وَ سگتېټس ته تاوان رسېلى شي"
دَ سوپيس دَ دې خبري ورسته كه څه هم بيا هغې سر يوې بلي خواته وَښورَولو، خو مخته يې خبره ځكه نه وكړله ، چي ناڅاپه ُاُم علي ، چي دَ حسن چوكيدارمائينه وه په منډه منډه تر هغوئ پوري رارسېد لو ورسته په عربۍ كي وَ وسا ته داسي ګډه شوه لكه هلته چي يې په كور كي څه لانجه پېښه شوي وي نو ځكه وسا هم ورسره په منډه بيرته دَ هغې دَ كور په لور ملګري لاړه خو څلور پنځه منټه ورسته چي هغوئ هم ورپسې ورسېد لو، نو وسا شنه شنه له خندا كېد له او په اږدو اوږدو تندكي ساهګانو كي واي ..
" " دا ُاُم علي هم عجيبه ښځه ده
" او بيا يې له سترګو اوښكي پاكولو ورسته وئيلو"
" وړوكي لوُر يې له بالا پورشن څخه په ژړا كي نارې څه ورته كړي وي ، چي دې دا ګڼلي وْ ، چي هغه وَ مېن هول ته لوېدلي ده لكه چي"
" نو بيا ؟ "
هغې وئيلو ..
" " نو بيا څه وْ، چي زه څنګه ورسره ګډه دَ هغې تر كوره ورسېدم ، نو هغه انجلۍ مخي ته راغله
او بيا نورو هم له وسا سره خنداګاني انتها ته وسپارَلې خو دَ سېلاني خله خندا ته ځكه نه جوړېدله ، چي دَ هغه زړه دا خبره منلي وه ، چي وسا زياته هغه له ذهنه ايستلى دى په دې خو يې دَ هغه او دَ ډاكټر پُو تر فلېټ ، چي هغې ورته خوښ كړى وْ په ځاى دَ بُوبا او منوېلا په هغو فلېټونو كي دَ خپلي پارټۍ لمانځلو دپاره رضا څرګنده كړه ، چي هغې بېخي نه خوښَولو-
_ 2 _
\" " پرون ماښام سېلاني داسي خبره كوله ، چي هغه كېدلى شي چي ډېر ژر دا ولات پرېږدي او بيرته خپل وطن ته لاړ شي "
" نه يوازي دا ، بلكې هغه په فون باندي له څو ټرېول اېجنټانو سره خبره هم وكړه "
دَ منوېلا مورتي په فلېټ كي دَ هغې دَ خبري په تائيد كي چي څنګه ډاكټر پُو داسي خبره وكړه ، نو دَ وسارنګ يو دم ژېړ شو او پوښتنه يې وكړه ..
" هغه څله بيرته تلل غواړي ؟ "
" دلته يې پاته څه شو ؟ "
دَ وسا دَ تپوس په ځواب كي چي پُو ورته خپله خبره سوال كړه ، نو هغې اوږې څنډ لو ورسته دَ څه وئيلو په ځاى خله داسي كږه كړه ، لكه هغه چي ګرسره دَ سېلاني په دُوك خبره لا نه وي نو ځكه خو منوېلا ورته په نېغه وَ وئيلو ..
" ګوره وسا .. ته ښه خبره يې ، چي هغه څومره مينه له تا سره كوي ، ته هغومره كركه ورڅخه كوې"
" " كركه او زه ؟
" " هو، كركه او ته
ډاكټر پُو چي لا سمه دَ هغې دا تورى تكرار كړى نه وْ ، چي دَ هغې په سترګو كي اوښكي وَڅركېد لې او بيا يې سړه ساه اخيستلو ورسته تر ډېره پوري سر په دواړو لاسونو كي نيولى لاندي څه كتلو ، چي ډاكټر پُو او منوېلا په سترګو سترګو كي يو بل ته په اشارو كي داسي وَ وئيلو ، لكه هغوئ چي په دې ډرامه كولو كي بريالي شوي وي نو ځكه خو نري نري موسېد لو هم -
كه څه هم هغوئ په خپل سوچ كي غلط نه وْ ، خو دَ وسا پرله پسې چپيا يې زړونو ته له ځينو نورو وسوسو سره ګنډلي دا وسواس هم دَ پوښتني په بڼه كي راپورته كولو ، چي چرته هغه خو له سېلاني څخه په رښتيا كركه نه كوي ؟ چي په ځاى دَ دې خبري چي سېلاني دَ تلو څخه بيرته راګرځوي ، هغي خله داسي وَګنډ له ، چي كه يې څه هم رنګ دې وخت دَ كتلو نه وْ ، خو تړلي خلې يې سوال څه ، بلا سوالونه زېږولو لګيا وْ -
اوس به لا منوېلا او ډاكټر پُو په خپلي دې ډرامې باندي په ځانونو كي تُوكلو، چي وساپه ژړا سر شوه او يو دم داسي دَ دروازې په لور ور روانه شوه ، لكه هغه چي په بله نه ، بلكې په دې څنګ فلېټ كي دَ سېلاني په خوا ورځي نوځكه هغوئ ورپسې نه ور وَ دانګلو، ولي چي غوښتلو يې ، چي وسا دَ هغوئ له مخه له سېلاني څخه دَ مافي اخيستلو په وخت خړه نه شي لاكن هغوئ خبر نه وْ ، چي هغه به په ځاى دَ سېلاني دَ فلېټ نېغه په بله ځي -
هم په دې خو، چي دَ نيم ساعت ورسته هغوئ سېلاني په خپل فلېټ كي يوازي وَ ليد لو، نو يې په ډېره حېرانتيا پوښتنه ورڅخه وكړه ..
" " ډاكټر وسا دلته نه راغله ؟
" " يَه نه ده راغلي .. ولي هغه راتله كه څه ؟
دَ هغوئ دَ سوال په ځواب كي دَ سېلاني دا سوال دَ هغه له خلې څه را وَ وتلو، چي دَ ډاكټر پُو او منوېلا خلې وازي پاته شولې مخته كه بيا هر څو سېلاني له هغوئ څخه تپوسونه كولو ، خو په هغوئ كي هيچا دَ هغې ډرامې په باب خبره ځكه نه كوله ، چي هغوئ نه غوښتلو، چي هغه دَ وسا په اړه نور زړه ماتى شي هو، كه څه هم دَ هغوئ په تند يانو باندي راغونډ و شوْ كرښو كي ليكلي كيسه تر ډېره هانده سېلاني وَ هم لوستله نو ځكه خو يې په زړه زړه كي كه يوې خواته دَ خپلو دغو خواخُوږو دَ هغه په حال باندي كړي غمرازي ستائيله ، خو بلي خواته يې دا خبره هم په زړه كي يقيني كېد له ، چي ګني وسا بيرته دَ هغه وَ خوبونو او خيالونو ته كوچ كوي لګيا ده"
_ 3 _
نن څورلسم دسمبر 1997ع وْ او دَ وسا دَ زوكړي ورځ، چي دَ منوېلا په فلېټ كي به ماښام لمانځل كېد له نو ځكه سېلاني كه يوې خواته دَ هغې په دې خوشالۍ خوشاله وْ، نو بلي خواته وسا په خپله خله نه ، بلكې دَ پُو، بېسنك ، منوېلا، وينډي او فلاويه په خلې بلنه وركړي وه خو سېلاني لا نور هم ورڅخه زړه ماتى شوى ځكه وْ ، چي دَ پُو له خوا دَ دې پارټۍ دپاره دَ فلېټ پيرزوئينه چي هغې په كومو ټكو رد كړې وه ، له هغې خبري څخه سېلاني دا وَ سنجولو، چي ګوندي داسي نه چي دَ هغه له ورتګ څخه يې خوشالياني كمي شي نو ځكه يې دا فېصله په زړه كي كړي وه ، چي تر څو هغه خپله وَ هغه ته بلنه نه كړي ور، نو هغه به نه ورځي -
او بلي خواته وسا په زړه كي دا خبره جوړه كړي وه ، چي هغه به په دې پارټۍ كي وَ سېلاني ته دَ ښه راغلي په وخت لاس وركوي او بيرته به يې خپلوي نو ځكه خو به يې په وار وار منوېلا ته وئيلو . .
" " ګوره ګوره چي دَ ګلوبل ملګري درڅخه هېر نه شي ټولو ته دَ راتګ بلنه وركړه
او هغې چي به كله ورته په ټوكو كي وَ وئيلو، چي ..
" " ټولو ته مي بلنه وركړي ده چپ له هغه ، چي ستا ورڅخه كركه كېږي
نو دَ منوېلا له قوله به هغه ورباندي غوټه شوه او په ژړَغوني ژغ كي به يې ورته وئيلو ..
" " پليز منوېلا .. داسي مه وايه ، څوك چي ته زما دُښمن ګڼې هغه مي دُښمن ګرسره نه دى
" " نو بيا څه دى ؟
خو دَ منوېلا دَ دې سوال په ځواب كي به يې هغه تورى بيا هم نه اخيستلو شاهد په دې ، چي په دې پارټۍ كي يې خپل تول نه يوازي سېلاني ته ښودل مقصد وْ بلكې نورو ته يې هم دا تاثر وركولو، چي هغه په سېلاني پسې دومره نه ، لكه سېلاني چي په هغې پسې څومره مري او داسي يې كه نورو ته نه ، خو منال سوډانۍ ته حتمًا وئيلي وْ نو ځكه خو له پارټۍ څخه دوې ورځي له مخه هغې سوډانۍ پېغلي وَ سېلاني ته په ټوكو ټوكو كي وئيلي وْ ، چي ..
" وسا هغه انجلۍ ده ، چي په درستي سي ډي سي كي يې خلګ دَ غاوري پېغلي په نوم پېژني زه خو وايم .. بس خپله يې كړه ، ګني څو مياشتي ورسته به دَ همېش همېش دپاره هوا شي درڅخه ... "
او دغه رنګه نوري نوري خبري چي نن مازيګر سېلاني په خپل فلېټ كي دَ NILE Tv پروګرامونه كتلو په وخت څنګه سوچ كولې ، نو دننه دننه يې يوه پښتون هم سر په وار وار پورته كولو او ورته وئيلو يې . ..
" سېلانيه .. دا دَ يوې ورځي مامله نه ده چي سترګي به ورباندي پټي كړې كه هغه واقعي دَ همېش دپاره ستا جوړېدل غواړي ، نو بيا به ته له اوسه ورته تول دروند ښئيې ګني بيا به ټول عمر ژاړې "
او څنګه څنګه چي ماښام دَ ماخستن په لور واټنونه لنډَولو، نو دَ منوېلا په فلېټ كي دَ سي ډي سي دَ لوستونكو پېغلو او ځوانانو شمېر زياتېدلو او بلي خواته سېلاني هم په هغسي تادۍ دَ ځان په لور راستنېد لو لګيا وْ او هغه وخت چي كله ډاكټر پُو هغه له ځان سره وړلو په ضد ستړى له فلېټ څخه وَ وتلو، نو غالب امكان دا وْ ، چي اوس به ورپسې څوك راځي او هغه به هم له ځان سره وړي لاكن نه څوك ورپسې راغلو او نه هغه له فلېټه په دې وجه وتلى شو چي داسي نه ، څوك يې وَ ويني ګوا تر اوسه لا دَ ماخُستن نهه نيمي بجې وې -
" " ما نه وئيلو، چي هغه له تا سره مينه نه كوي؟
سېلاني له ځان سره بُوڼېد لو ورسته پورته شو او له فريج څخه يې دَ كوكا كولا كېن را وَ يستلو او بيرته چي په ټي وي لانچ كي پرتې صوفې په لور ور روان شو، نو يې دَ كېن خُولبزى خلاسولو سره سم دَ ډاكټر وسا په نوم لومړى غوړپ كولو ورسته بيا ځانته وئيلو، چي ..
" " كه هغې له تا سره سُوچه مينه كولى ، نو دومره ضد به يې نه وْ كړى كله هم ؟
په صوفې باندي كښېنستلو ورسته يې سړه ساه اخيستلو سره سم چي څنګه په ريموټ باندي ټي وي اّن كړه ، نو يې په ځان باندي يوه پسخوندي موسكا كولو ورسته لا داسي هم وَ وئيلو ..
" دَ هغې تر ميني خو دَ سوپيس دُښمني لا هم ښه ده ، چي كه نوره هر څومره زاوالجنه ده ، لاكن له لومړۍ ورځي يې تر ننه پوري په نره خو راباندي پيرزوْ شي"
او بيا يې هغه وخت لا نور هم زړه وَچاوْد لو، چي دَ منوېلا له فلېټه دَ ميوزك سره سم دَ ملګرو ژغونه هم پورته كېدل شروع شولو داسي ښكاره كېد لو لكه وسا چي په دې پارټۍ باندي ځكه زياته خوشاله وي ، چي سېلاني په كي نه شته نو ځكه خو له وخت سره سره سم سېلاني هم دَ وسا په نوم كركه په داسي ټكوكي ليكلو ته چمتو شوى وْ -
" زه غلط نه وم .. هو ، چي په خپل ستړي فكر باندي مي نه يوازي دَ تېرو ټولو ليد لو نړئيزو څېرو دَ نقشونو په راهنمائي كي دغه څېره خپل اّخيري مرام وَګڼلو، بلكې هغه مي هم دَ فرعوني تاريخ په لارو باندي تر ځانه پوري را وَ رسوله خو داسي راته ښكاري چي لا خو زما په برخه نور نور سفرونه هم ليك دي"
دومره په خپلي ډائرۍ باندي نوښته كولو ورسته چي هغه دَ جنګ له ميدانه دَ يو تښتېدلي عسكر په شان څنګه دَ فلېټ دَ دروازې په لور ګامونه اوچت كړو، نو يې دروازه خلاسولو سره سم داسي هم وَوئیلو ..
" " لعنت لېږم په داسي ميني باندي
او بيا چي يې بيرته دروازه له دباندي غولپ كړه ، نو يې لاس په اّخيري ځل دَ خپلو ارمانونو وَ هغه څلي ته پورته كړو، چي دَ هغه دَ درست ژوند دَ مړو ارمانونو په قبر باندي ولاړ وْ هو..څو غټي اوښكي په رخسارونو باندي تويوَلو سره سم يې په سړې ساه كي دا دوه توري هم مل كړو..
" " خداى دي عمر دراز كړه اې دَ فرعونانو سر فرعوني وسا
دومره وئيلو ورسته په پوړيانو باندي لاندي هغې مځكي ته كښته شو چي فرعونان يې نه يوازي زېږولي دي ، بلكې په هر دور كي يې روزلي هم دي -
_ 4 _
دلته سېلاني په مات زړه دې وخت دَ مقعطم په كارنيچ باندي دَ وسا بې وفائي او ظلم ژړَولو او هلته له لومړي ماښامه تر دې دمه ، چي ګهړۍ دَ شپې يولس بجاولې لا هم په يوه نا يوه بهانه باندي ډاكټر وسا پارټۍ ځكه ځنډَ وله ، چي كېدلى شي سېلاني ورته راشي كه څه هم څو ځله يې منوېلا او ډاكټر پُو ته په پټه خواست هم دَ سېلاني دَ راوړلو كړى وْ ، خو هغوئ ځكه نه شو ورتللى ، چي نن ماڅپښين سېلاني وَ دې ټولو ملګرو ته ليكه كش كړې وه ، چي ..
" كه هغه خپله دَ ده وَ بللو ته نه راغله ، نو ګورئ ګورئ چي زما په لور رانه شئ .. ګني زه به دَ عمر سلام درڅخه بند كړم"
او بيا چي به چا هم له ډاكټر وسا څخه دَ پارټۍ دَ ځنډولو حال وكړو، نو هغې به ورته په مړې موسكا كي وئيلو، چي ..
" " له ښاره زما يو كزن راتلونكى دى
بلكې يوې نيمي پېغلي خو لا دَ سېلاني دَ نه راتګ پوښتنه هم ورڅخه وكړه ، خو دې كبرجني وسا به په ځاى دَ څه وئيلو ورته اوږې داسي وَ څنډ لې لكه هغه چي يې هيڅ باك نه همخ كوي -
لنډه دا ، چي اوس زياته ملګري ديغېد لو لګيا وْ، نو ځكه خو وسا هم په زړه باندي كاڼى كښېښېدلو او ماته يې وَ منله له منوېلامورتي سره سمه دباندي راختلو ورسته چي څنګه دَ سېلاني دروازې ته وَ درېد له، نو په دروازې پوري راټال غولپ يې زړه داسي دړي وړي كړو ، چي دروازه يې اېله په لغتو ويښتلو ماته نه كړه او بيا يې دَ منوېلا په اوږه باندي سر ږد لو ورسته دومره په ارماني سُلګئيو كي وَژړلو، چي منوېلا هم ورسره سمه په ژړا سر شوه -
هغوئ چي څنګه دباندي وَ ځنډېد لې ، نو ډاكټر پُو او بېسنك پوهى شولو ، چي مامله سمه نه ده نو ځكه چي ورپسې وَ وتلو، نو څه ګوري ، چي وسا او منوېلا دَ سېلاني دَ فلېټ وَ بندي دروازې ته ولاړي دي او ژاړي -
" " نو دَ دې مطلب دا دى ، چي هغه چرته وتلى دى؟
ډاكټر پُو لا دا خبره سمه سوال كړي نه وه ، چي وسا دَ ماشومي انجلۍ غوندي داسي په باغارو شوه چي دَ هغه او بېسنك په سترګو كي هم اوښكي په جرګه شولې -
" .. " داسي نه چي دَ خلګو له مخه تماشه شو
منوېلا دومره وئيلو ورسته خپلي اوښكي پاكي كړې او له ډاكټر وسا سره يې په ګډه چي په فلېټ كي بيرته ګامونه څنګه ږد لو ، نو پُو او بېسنك هم ورپسې لنډ وره غلو او په يوه صلاح باندي يې ژغ پورته كړو ..
" " هېپي برتهـ ډې ټو يُو
او له دې سره سم ملګرو له يو بل سره ژغونه دَ ميوزيك په زېر وبم كي سمَولو په نيت فلېټ چي څنګه په سر واخيستلو نو هلته سېلاني هم دغه وْ ، چي دَ پلا زې په پوړيانو كي دَ منوېلا دَ فلېټ تر دروازې پوري راورسېد لو خو په ځاى ورته دَ ننوتلو يو دم ورسره جوخت خپل فلېټ دروازې ته ځكه ورغبرګ شو ، چي دَ منوېلا له فلېټه يې راتلونكي ژغونو پښې په هغه لور له پورته كېدلو څخه قاصري شوي وې هم په دې خو يې چي څنګه غولپ خلاس كړو ، نو دَ هغو ژغونو له ردم سره سره يې سم ژغ پورته كړو او په خالي لاس خپل فلېټ ته داسي ننوتلو لكه هغه چي كور نه .. دَ هغه ګور وي ، له تيارو ډك ګور -
" " هېپي برتهـ ډې ټو يُو .. هېپي برتهـ ډې ټو وسا.. وسا وسا وسا
او بيا يې دَ وسا وسا وسا له تكرار سره سم دَ ماشوم غوندي دَ ورستي ځل دپاره په خپلي يكړۍ باندي له داسي كُوټلي احساس سره مل وَ هم ژړلو، چي ګني ..
" " هغه بيا يوازي شو هو، همېش همېش دپاره
هم ځكه خو يې بيا په وړو وړوسُلګيانوكي له خپل زپلي او كُوټلي زړه څخه داسي ګيله هم وكړه ..
" اې زړګيه .. دا څېرې چي هر ځل تا غولوي به دي تركومه پوري كچكولى كوي ؟ ښه به نه وي ، چي دا كچكول دي مات كړې"
او بيا يې لاس دَ خپل زړه دَ ارمانونو دَ جنازې او دَ هغې وسا په لور پورته كړو ، چي دَ هغه له خياله يې دې وخت داسي په دربي او خرپي باندي دَ زوكړي پارټۍ بې له هغه چا لمانځل كېد له ، چي هغې ورته څو هفتې مخكي دَ " ژوند ملګرى " نوم وركړى وْ نو ځكه خو هغه په دَعا كي وئيلو ..
" كه به دا وخت هم دَ قبولو وي ، نو لويه ربه .. وسا په خپل ژوند كي وسا كړې ، كه څه هم زه پرې وسا نه شوم او نه زما ستړيا پرې وسا شوه خو ستره خدايه .. ته يې په خپل امان كي وَساتې ته يې مه خوږَوې .. ته يې مه ځورَوې .. ته يې مه كړَوې ..هو ته يې خوشاله لرې ، خوشاله لري ، خوشاله لرې ... "
او دَ وير په داسي ګردان هغه سېلاني چي تر پرونه وَ وسا ته څومره هوسېد لو .. نن يې دَ هغې وسا په نوم كركه چي په ورستي ځل په ډائرۍ كي ليكله ، نو توان يې په بدن كي فقط دومره پاته شوى وْ ، چي دَ خوني تر پلنګ پوري يې اېله ځان وَ رسولو او دَ يو ې شهيدي موركۍ پاته شوي ماشوم په رنګه په نرئيو سُلګيانو كي لاړو ويده شو-
بل اړخ ته كه څه هم دَ منوېلا په فلېټ كي دَ وسا دَ خوشالۍ په نوم يوه غوغا جوړه وه ، خو دَ هغې په زړه يو خداى خبر وْ يوې خواته يې كه دَ سېلاني په نه راتګ زړه مات شوى وْ ، نو بلي خواته يې په سېلاني باندي تر اوله زياته مينه هم ځكه راتله ، چي هغې يې دا پښتني هوډه دَ خپل ښه او محفوظ ژوند ضمانت ګڼلو نو هم ځكه چي كله پارټۍ سرته ورسېد له ، نو وسا وَ منال ته دَ منوېلا ، سوپيس او يو څو نورو پېغلو وَ مخي ته په ډاګه داسي وَ وئيلو ..
" چي زه يې دَ هغه وَ دې نننۍ ظالمي روئيې ته پام كړم ، نو زړه مي غواړي چي دا سېلاني مړ كړم او غوښي يې اومې وَ خورم .. خو بيا چي يې دې كلكي هوډي ته ځيره شم ، نو وايم چي اوس اوس ورشم او په پښو كي يې وَ رغړېږم"
نو ځكه خو منال او منوېلا ورباندي له ډېره رشكه چي " واوْ" له خلو ورته وتلو، نو سوپيس سم دستي ورباندي داسي وار په پسخوندي موسكا كي وَكړو ..
" دا سېلاني ، تاسو اوس په مئينانو كي ګڼئ كه هغه مينه كولى ، نو اوس به هغه دلته دَ ډاكټر وسا له څنګه ولا ړ وى او له دې سره به يې خوشالي ګډَ ولى "
خبره كه يې څه هم بده نه كوله ، خو وسا ورباندي داسي خله پرې كړه ، لكه هغې چي سېلاني ته نه ، بلكې وَ دې ته بد رد وئيلي وي مخته بيا دَ هغوئ دواړو تر منځه لږ يا ډېر غال شوى ، خو دا خبره نن په دې پارټۍ كي هر يوه تسليم كړله ، چي وسا په سېلاني پسې مري -
ګوا نن وساعربلور دَ ظالم فرعون سنيفرو دَ هغې خوني كشي فرعوني راڼۍ هيتيفېرس په بڼه نه ، بلكې دَ هغې بلي پېغلي هيتيفېرس په رنګ كي رنګېدلو ته جوګه شوي وه ، چي په درست فرعوني تاريخ كي يې دَ يوې عادلي ښځي په څير دَ انصاف تول دَ هيچا په حق كي ناحقه دروند نه شو او نه يې خپل خواخُوږي نر عادل ملګري كاديپ ته كله په زړه كي خيره پيدا شوه هرڅه هرڅه ،خو توپير په هغې او دې ښځي كي دا وْ ، چي هغې دَ ميني دَ تقاضو په سمه هري ماتي ته غاړه په نره ږد له او د لته وسا وه ، چي كه يې څه هم په سينې كي دَ غوښي زړه درلودلو، خو خپلو كبرجنو روئيوكاڼى ته مونوَله -
كه څه هم دَ پارټۍ ورسته منوېلا او بېسنك په ګډه ورته وئيلي وْ ، چي اوس لا سېلاني په خپل فلېټ كي دى كه يكړه نه شي ورتلى ، نو هغوئ به ورسره ملګري لاړ شي خو هغه وه ، چي دَ ماتي خوړلو پرته يې هم ننواتى نه خوښَولو او بيا بيا به يې هغوئ ته وئيلو، چي ..
" كه څه هم نن سېلاني ډېر بد وكړو ، چي نه راغلو خو هغه به سهار وَ سېلاني ته لاس ضرور وړاندي كړي او بيرته به يې خوشاله كوي"
خو بلي خواته سېلاني له ځان او جهانه بې خبر يو ځل بيا دَ خوبونو په ټاپوګانو كي دَ وسا شاپېرۍ په لټون پائڅې پورته كړي وې او ورپسې له نوْ لاكن بېخي ستړو هيلو سره ولاتونه كچلو لګيا وْ -
