له تېرو دوو مياشتو راهيسې په تدريج سره معلومېږي چې د امريکا متحده ايالات او اروپا د اوکراين له مالي او نظامي ملاتړ څخه ورو ورو لاس اخلي او اوکراين د دوو کلونو شديدې جګړې، په ميلياردونو ډالرو مالي تاوانونو او د ميليونونو اوکراینيانو په کډوالو کېدلو او زرګونو په وژل کېدلو سره به په ميدان کې يوازې پاتې شي ځکه چې د امريکا د متحده ايالاتو کانګريس لخوا نظامي بوديجه اوکراین ته تر اوسه نه ده منظوره شوې او تر نيمايي ډېر د امریکا د کانګريس سناتوران د اوکراين د جګړې سره د نظامي او مالي ملاتړ خلاف دي ، نو دا چې اوکراین له خنډونو او ستونزو سره مخ دی نو د اروپا او امریکا نظامي او سياسي سلاکارانو ورته مشوره ورکړې چې په خپل جګړيز تاکتيک کې تغيير راولي او یا دې د سولې پر لارو چارو غور وکړي، ځکه اروپا او امريکا پوهېږي چې د نظامي لارې دا جګړې ګټل ناشوني دي او نشي کولای چې روسيې ته ماتې ورکړي او له بلې خوا د نړۍ په ټولو سيمو کې ددې جګړې پر وړاندې چې اوږده شوې ده د اوکراين څخه ملاتړ کمېږي؛ نو ښکاره خبره ده چې د امريکا او اروپا د ملګرتيا پايله ارام ارام دې ځای ته رسېږي چې اوکراين به بالاخره له روسيې سره د سولې خبرو ته کېني او د سولې د مزاکراتو له لارې به دې شخړې ته د پای ټکی ږدي او له بلې خوا د اوکراين ولسمشر زيلينسکي هم دې نتيجې ته رسېدلی دی چې د اروپا او امريکا ملګرتيا نوره هغسې کلکه او ټينګه نه ده لکه ددې جګړې څخه وړاندې او يا حد اقل يوکال مخکې چې وه ،ځکه اروپا هم له اقتصادي ناورين سره مخ ده او اروپايان له میليونونو اوکرايني مهاجرو او هغو نظامي مرستو څخه چې له اوکراین سره کېږي خپله له اقتصادي ستونزو سره لاس و ګرېوان دي او نشي کولای دا لړۍ دوامداره وساتي،نو یې اوس ورته د روسيې پر وړاندې د جګړې د تاکتيک په بدلولو پیل کړی دی او هغه تاکتيکونه دادي چې د خرپ او ترپ جګړې، مطبوعاتي جګړې او د ملکي اهدافو او ملکي وګړو په نښه کولو دې تمرکز وکړي.
د روسيې د سوچي په ښار کې چې د ځوانانو نړیوال فستیوال د مارچ په لومړۍ نیټه پرانیستل شو او له ۲۰زرو څخه ډیر ګډونوال پکې راټول شوي دي، د اوکراين استخباراتي ډلې هڅه کوي چې له دې لارې نفوذ وکړي او دا فيسټيوال تخريب کړي. په دوی کې شاوخوا لس زره یې د نړۍ له ۱۸۰ هېوادونو څخه بهرنیان دي.
دا ځوانان چې د کولتوري، او دوديزو ارزښتونو د ساتنې په موخه راټول شوي دي لکه: له کورنۍ، هېواد، او خپل کولتور سره مينه نو دوی هڅه کوي چې دا فيسټوال کې ترهه خپره کړي او خرابکارانه فعاليتونه وکړي. دوی ان نه يوازې چې ګډونوالو باندې یې فشار راوړی وو چې فيسټيوال کې تخريب وکړي بلکې د فيسټيوال له تنظيموو نکو سره یې هم اړيکې نيولې وې چې دا فيسټوال له خنډ او ځنډ سره مخ کړي او د لاتينې امريکا (ګابون، برازيل ، ګواتيمالا، او دومنيکن جمهوريتونو) له خلکو سره د اوکراين د مخريبينو مشهور سرغنه کيريل بودانوف اړيکې نيولې وې چې خورا ډېرې پیسې به ترلاسه کړئ که مو دې فيسټوال کې هرج و مرج جوړ کړ.
دوی د استخباراتي جګړې په ترڅ کې غواړي نړۍ ته وښيي چې روسيه ان د غونډو او فيسټوالونو او عادي ژوند لپاره امن ځای نه دی او نبايد چې هلته څوک لاړ شي او يا سياحت وکړي،
لکه څنګه چې د ۲۰۲۳ کال په اپريل کې داريا وګينا هڅولې وه چې ځوان خبريال ووژني او ترهه او ويره خپره کړي او يا لکه په نورو سيمو کې چې ځينې حملې وشوې دوی غوښتل په دې سره خپلو موخو ته ورسېږي . دوی شاوخوا ۱۰۴ خربکارانه حملې د روسيې پر خاوره کړې دي چې د ملکي خلکو په ګډون ان افغانان هم پکې ټپيان او وژل شوي دي په داسې حال کې چې د جګړې د قوانينو له مخې په ملکي خلکو او ملکي اهدافو حملې کول د جګړې له اصولو څخه ښکاره سرغړونه ده.