تکل عبدالرحيمزى

دا دلته د چا زور دی دروازې دي ټولې بندې
داڅنګ خلک راټول دي دا کوڅې دي ټولې بندې

ورځئ چې مخکې ورشو ويې ګورو چې څه حال دی؟
کاروان ګورﺉ تېرېږي، قافلې دي ټولې بندې

مزل زموږه سُست دی د منزل ګامونه تېز دي
ډېر ستړي يو ستومانه خو دمې دي ټولې بندې

دا چا ورته خبر د لېونو د راتګ کړﺉ
منګی مات دی، رباب نشته، حجرې دي ټولې بندې

موږ څوک پېژني، څوک يو، خدای خبر چې څه به غواړو؟
غوښتنې زموږ نشته فيصلې دي ټولې بندې

نا آشنا غوندې قانون دی نا آشنا خبرې اورم
د مرګ اجازه کېږي جنازې دي ټولې بندې

اشنا راته د سترګو په رموز کې هر څه وايه
خبرې ټولې بندې اشارې دي ټولې بندې

تکله مساپر يې ته به خپل وطن ته لاړ شې
ارمان د ساقي ژوند ته چې نشې دي ټولې بندې