د تایلینډ مرستیال لومړي وزیر (پراوېت وانګسوان) په يوه غونډه کې ژمنه کړی چې د هیواد سرتاسره به د انسان د قاچاق وړونکو ډلو پر وړاندې په دوامداره ډول سخت اقدامات ترسره کړي.

مرستیال لومړی وزیر پراوېت چې د تایلینډ د دفاع وزیر دنده هم پرمخ وړي دغه غونډې ته چې د انسانې قاچاق د مخنیوي په پار جوړه شوې وه، ډاډ ورکړ چې د تایلینډ حکومت د انساني قاچاق ضد اقداماتو تراوسه مثبتې پایلې درلودلي دي او په راتلونکې کې هم ترې د ښو لاسته راوړنو هیله کیږي.

نوموړي ویلي، اړوند چارواکي به د تایلیند په هره سیمه کې د انسان د قاچاق ضد عملیاتو ته دوام ورکړي ترڅو د دغه ناوړه پدیدې قربانیان د بشر د حقونو او اصولو مطابق وژغوري او هغوی خوندي وساتي.

نوموړي ویلي، چارواکي یې موظف کړي چې د انساني قاچاق هغه پټې ډلې پیدا او له منځه یوسي چې د نجونو، خیراتګرو، غریبو کارګرو او ناقانونه مهاجرو څخه د قاچاق لپاره استفاده کوي او هغوی د ناوړې ګټې اخیستنې په پار تایلینډ ته او یا نورو هیوادونو ته انتقالوي.

نوموړي همداراز د تایلینډ ټولو دولتي چارواکو ته خبرداری ورکړی چې که هغوی د انساني قاچاق په کومه قضیه کې ښکیل وموندل شي نو پرته له کوم استثناء څخه به محاکمه کړل شي.