د استاذ نیازي د شخصيت په هکله يوه خاطره

محترم قاضي صاحب شير محمد دې الله ژوندى لري، د استاذ نيازي په هکله يې را ته په يوه غير رسمي مرکه کې وويل:
استاذ غلام محمد نيازى عجيب شخصيت او بېلګه قايد و. کله چې به يې خبرې کولې په خلکو به يې تاثير کاوه، ويده به يې ويښاوه. د هغه د قيادت او رهبرۍ کې خداى يو لوى رعب ايښى و، کله چې به د پوهنتون به رسمي غونډو کې ناست و، کمونستو استادانو به د دې لپاره چې نيازى صاحب ناست دى، ويل به يې چې زه لمونځ کوم او روژه نيسم څو استاد نيازي ته ځان مسلمان ښکاره کړي.

ښايي دا خاطره ځينو ته هسې يوه کيسه ښکاره شي، خو زه يې ډېر متاثر کړم، ځکه په موږ کې داسې څوک نشته چې خلک په غونډو کې د هغه له ډاره خپلې د زړه خبرې ونشي کړاى. زه ډيري وينم چې ځان جهادوال بولي خو په غونډو کې خلک پرې تمسخر کوي او دى حتى دا تمسخر ځوابوى هم نشي، دا خو لا پرېږده چې په خلکو يې رعب وي.
ريښتيا چې شهيد استاذ عبقري شخصيت او حقيقي مشر و، الله دې جنتونه ځاى کړي.