روسيه پر طالبانو د نړيوالو بنديزونو د لرې کولو پلوي ده
د افغانستان لپاره د روسيې ځانګړی استازی ضمير کابلوف وايي، چې روسيه پر طالبانو د نړيوالو بنديزونو د کمولو پلوي کوي، پدې شرط چې د افغانستان له ملي ګټو سره په ټکر کې نه وي. کابلوف تر دې وړاندې اعلان کړی و، چې طالبان نور د روسيې دښمنان نه، بلکې د داعش پر وړاندې د جګړې پارټنران دي. ضمير کابلوف د روسيې خبري آژانس (تاس) ته دا هم ويلي، چې راتلونکې مياشت به روسيه د افغانستان د امنيتي ځواکونو لپاره لس زره کلاشنيکوف توپک مرسته وکړي. دا توپک به د افغانستان کورنيو چارو وزارت ته ورکړل شي. په افغانستان کې د داعش له راپورته کېدلو سره، د روسيې علاقمندي ډېره زیاته شوې ده او هڅه کوي د يوې فعالې رسمي او استخباراتي دېپلوماسۍ له لارې خپل اغېز په افغانستان کې پراخ کړي. داسې ګونګسې دي، چې روسيه اوسمهال هم د افغانستان په شمال کې يو شمېر جنګسالارانو ته او هم طالبانو ته وسلې ورکوي، چې د داعش پر وړاندې ودرېږي.
